Bogdan Guskov jang qiladigan turnir aytildi

Angrenlik aralash yakkakurash ustasi 1 avgust kuni Serbiya poytaxti Belgrad shahrida bo'lib o'tadigan UFC Fight Night 283 turnirida oktagonga qaytadi.

Bu haqda Meta Fight nashriga bergan intervyusida "Carevich"ning murabbiyi Gor Azizyan xabar berib, tashkilotning sobiq chempioni Yan Blaxovichni potencial raqib deb atagan.

"Bogdan 1 avgust kuni Serbiya turnirida jang qiladi, lekin kim bilan, hozircha bilmaymiz. Ammo bizga UFC`da Bogdan u erda 1 avgustda bo'lishini aytishdi. Hozircha shartnoma yo'q, lekin Polsha fuqarosining kelishini kutyapmiz. Ikki hafta oldin Blaxovichni jarohatlangan oyog'i bilan yurganini ko'rgandim. Biz u bilan jang o'tkazishni juda ham xohlaymiz. U hozir reytingda to'rtinchi o'rinda - bu juda yoqimli joy", - dedi rossiyalik mutaxassis.

Guskov va Blaxovich o'rtasidagi birinchi jang o'tgan yilning dekabr oyida Las-Vegasdagi UFC 323 turniri doirasida bo'lib o'tgan va unda hakamlarning ko'pchilik ovozi bilan durang natija qayd etilgan edi. Ularning revansh jangi 9 mayga belgilangandi, biroq polshalik sobiq chempion tizzasidan jarohat olgani bois jang bekor qilingandi.