Bugun to'rt erkin kurashchimiz jahon chempionatida gilamga chiqadi. G'ulomjon bronza yo'lida kurashadi

Kecha dunyo birinchiligida erkin kurash bahslari boshlandi. Hamyurtlarimizdan birgina G'ulomjon Abdullaev medal uchun kurashish imkoniyatini qo'lga kiritdi. Parij-2024 Olimpiadasi bronza medali sovrindori 1/16 finalda Koreya Respublikasi vakili Kim CHang Songni 6:0, 1/8 finalda Puero-Riko kurashchisi Smitni 6:2 hisobida mag'lubiyatga uchratdi. Murosasiz kechgan 1/4 final bellashuvida esa rossiyalik Olimpiada chempioni Zavur Uguevga 2:3 hisobida imkoniyatni boy berib qo'ydi. 

Uguev finalga chiqqani bois, G'ulomjon bronza medali uchun kurashish imkoniyatini saqlab qoldi. Buning uchun u bugun o'tish bellashuvida KXDR vakili Kvang Myong Kimga qarshi gilamga chiqadi. Abdullaev g'alaba qozongan taqdirda jahon chempionatining bronza medali uchun bahs olib boradi. 

SHuningdek, bugun yana uch nafar erkin kurashchimiz - Asadbek Saidto'raev (-57 kg), Javohir CHuliboev (-74 kg) va Mirzo Hayitov (-79 kg) jahon chempionatidagi yurishini boshlaydi. 

Eslatib o'tamiz, jahon chempionatida ishtirok etgan Rustam Assakalov bosh murabbiyligidagi yunon-rum kurashi bo'yicha O'zbekiston terma jamoasi umumjamoa hisobida uchinchi o'rinni egallagandi.