28 noy 13:57
Yangiliklar
![](/upload/storage/23552_220.jpg)
Boks bo'yicha O'zbekiston terma jamoasi azosi Go'zal Ismatova: Maqsadim – jahon va olimpiada chempioni bo'lish
Mamlakatimizda sportni yanada rivojlantirishga qaratilayotgan etibor
samarasida zamonaviy sport majmualari, bolalar va o'smirlar sport
maktablari foydalanishga topshirilayotir, o'g'il-qizlarimiz sog'lom va
barkamol bo'lib kamol topib, nufuzli musobaqalarda yuqori natijalarga
erishmoqda.
Ana shunday sportchilardan biri – Go'zal Ismatovadir. U 1996 yil Jizzax
viloyati, Zomin tumanida tug'ilgan. O'n besh yoshidan tajribali murabbiy
G'ayrat Karimovdan boks sirlarini o'rganib kelmoqda.
– Go'zalni ilk marotaba ko'rganimda Jizzax olimpiya zaxiralari kollejining
ikkinchi kursida o'qib, sportning basketbol turi bilan muntazam
shug'ullanar edi, – deydi murabbiy G'.Karimov. – Uning bo'y-basti,
chaqqonligi va intilishini ko'rib, undan yaxshi bokschi chiqishiga amin bo'ldik.
SHundan so'ng uni mashg'ulotlarga taklif qildik.
O'ziga bo'lgan ishonchning kuchliligi, aniq maqsad sari qatiy intilishi
tufayli Go'zal qisqa muddatda viloyatning boks bo'yicha mohir sportchilari
qatoridan o'rin oldi. U mashg'ulotlarda toblandi. Ilk muvaffaqiyatiga 2013
yil Andijonda o'tgan "Oltin vodiy" xalqaro turnirida erishdi. Finalga
qadar barcha raqiblarini mag'lubiyatga uchratib, kumush medalni qo'lga kiritdi
va O'zbekiston terma jamoasi azoligiga qabul qilindi. Bugunga qadar
olti marta mamlakat chempionati va bir marta O'zbekiston kubogi
musobaqasida g'alaba qozondi.
Istedodli bokschimiz 2015 yil Xitoyda o'tkazilgan Osiyo chempionatida shohsupaning ikkinchi pog'onasidan joy egalladi.
– O'shanda birinchi marotaba xalqaro musobaqada qatnashgandim, – deydi
Go'zal. – Osiyo chempionatining yarim final jangida qozog'istonlik Lazzat
Kungenbaevani texnik nokautga uchratdim. Afsuski, finalda xitoylik Vang
SHijin bilan o'tgan bahsda biroz tajribasizligim pand berdi. Men o'z
oldimga keyingi safar albatta oltin medalni qo'lga kiritaman, deb maqsad
qo'ygandim.
Vetnamda o'tkazilgan bu yilgi qita chempionatida u o'z maqsadiga erishdi.
Lochin Qo'chqorov boshchiligidagi terma jamoa safida nufuzli musobaqaning
oltin medaliga sazovor bo'ldi. 81 kilogrammdan og'ir vazn toifasidagi charm
qo'lqop ustalari o'rtasidagi bahslarda hindistonlik Sima Puniya va mezbon
bokschi Ti Tran Ni ustidan g'alaba qozonib, Osiyo chempioni bo'ldi. G'olib
sportchimiz sharafiga Vatanimiz bayrog'i ko'tarilib, davlatimiz madhiyasi
yangradi.
– Maqsadim – jahon va Olimpiada chempioni bo'lish, – deydi Go'zal. – Buning
uchun mamlakatimizda biz, sportchilarga barcha sharoit yaratilgan. Bor
kuch-g'ayratimni ana shu maqsad sari yo'naltirishga harakat qilaman.
Go'zal hozirda Jizzax davlat pedagogika instituti jismoniy tarbiya va
jismoniy madaniyat fakultetining 4-kurs talabasi. Uning yutuqlari bilan
bugun millionlab sport muxlislari g'ururlanmoqda.
Javohir Toshxo'jaev, Muhammad Amin (surat), O'zA
Fikrlar