Boks bo'yicha SHarof Rashidov xotirasiga bag'ishlangan musobaqa o'tkazildi

Dastur doirasida 2002-2003 yillarda tug'ilgan o'smirlar o'rtasida boks bo'yicha O'zbekiston kubogi musobaqasi bo'lib o'tdi.

O'zbekiston Respublikasi Jismoniy tarbiya va sport davlat qo'mitasi, Milliy olimpiya qo'mitasi, Boks federaciyasi hamda Jizzax viloyati hokimligi hamkorligida tashkil etilgan musobaqada Qoraqalpog'iston Respublikasi, viloyatlar va Toshkent shahridan 364 nafar yosh sportchi qatnashdi.

Jizzax olimpiya zaxiralari kollejida bir hafta davom etgan musobaqalarda 15 vazn toifasida g'oliblar aniqlandi. G'olib va sovrindorlarga SHarof Rashidov siymosi tushirilgan maxsus medallar, diplom va qimmatbaho esdalik sovg'alari topshirildi.

Musobaqa doirasida yosh sportchilar atoqli davlat arbobi va yozuvchi SHarof Rashidovning hayot va mehnat faoliyati, u tug'ilgan hududning diqqatga sazovor joylari bilan tanishdi. SHarof Rashidov yodgorlik majmuasi, muzeyi, Hamid Olimjon va Zulfiya xiyoboni, Hamid Olimjon va Zulfiya nomidagi o'zbek tili va adabiyoti fanini chuqurlashtirib o'qitishga ixtisoslashtirilgan maktab-internati, yurtimizning ulug' farzandlari voyaga etgan zaminda amalga oshirilgan bunyodkorlik ishlari yoshlarda katta taassurot qoldirdi.

– Musobaqa tengdoshlar bilan nafaqat boksda o'zaro kuch sinashish, balki Vatanimiz tarixini, buyuk ajdodlarimiz hayotini o'rganishda ham amaliy dars bo'ldi, – deydi musobaqa g'oliblaridan biri Namangan olimpiya zaxiralari kolleji o'quvchisi Ilhom Ortiqov. – Musabaqadan bo'sh paytlarimizda Jizzaxning diqqatga sazovor joylariga uyushtirilgan ekskursiyalar Vatanimiz tarixi, ulug' ajdodlarimiz hayoti haqidagi bilimimizni boyitdi. Ayniqsa, SHarof Rashidov hayoti va faoliyati haqida ko'p yangi malumotlarga ega bo'ldik.