Boks. Umumjamoa hisobida ikkinchi bo'ldik, Qozog'iston terma jamoasi uchinchi

Hal qiluvchi final janglarida 4 nafar o'zbekistonlik charm qo'lqop ustasi ringga ko'tarilgan bo'lsa, ulardan birgina SHahram G'iyosov kubalik raqibi Roniel Iglesiasni mag'lubiyatga uchratib, jahon chempioniga aylandi.

Hakamlar Olimpiada chempioni Hasanboy Do'smatovga noxolislik qilib, g'alabani kubalik bokschiga taqdim etishdi. Jasurbek Latipov va jahon chempionati kashfiyotiga aylangan Iqboljon Xoldorov kumush medal bilan taqdirlanishdi.

Finalga etib kelish bo'yicha biz faqat Kubaga yutqazdik. Finalda kubalik bokschilardan 7 nafari ringga chiqdi. Qozog'istonda bu son 3 nafarni tashkil qildi.

Yakunda umumjamoa hisobida Kuba terma jamoasi birinchi o'rinni egalladi. Ozodlik oroli vakillari 5ta oltin medalni qo'lga kiritishdi. Xoanis Argilagos (49 kg), Yosbani Veitiya (52 kg), Endi Krus Gomes (64 kg), Xulio Sesar la Krus (81 kg) va Erislandi Savon (91 kg) jahon chempioniga aylanishdi. Lasaro Alvares (60 kg) va Roniel Iglesias (69 kg) kumush medalga sazovor bo'ldi.

Quvonarlisi, O'zbekiston terma jamoasi umumjamoa hisobida ikkinchi o'rinni band etdi. CHarm qo'lqop ustalarimiz jahon chempionatida to'liq (10 bokschi) tarkib bilan ishtirok etishdi va yakunda 6ta medalni qo'lga kiritishdi. SHoxsupaning eng yuqori pog'onasidan SHahram G'iyosov (69 kg) joy olgan bo'lsa, Hasanboy Do'smatov (49 kg), Jasurbek Latipov (52 kg) va Iqboljon Xoldorov (64 kg) kumush medalga ega chiqdi. Bektemir Meliqo'ziev (81 kg) va Sanjar Tursunov (91 kg) Toshkentga bronza medali bilan qaytadi.

Umumjamoa hisobida Qozog'iston terma jamoasi kuchli uchlikka yakun yasab berdi. Qayrat Eraliev (56 kg) jahon chempioni bo'ldi. Abilxan Amankul (75 kg) va Kamshibek Kunkabaev (+91 kg) ko'ksini kumush medal bezadi. Jomart Erjan (49 kg), Ablayxan Jusupov (69 kg) hamda Vasiliy Levit (91 kg) jahon chempionatining bronza medaliga loyiq ko'rilishdi.