Bokschilarimiz JCH oldidan Ekaterinburgdagi o'quv-mashg'ulot yig'inlarida ishtirok etishmoqda + FOTO

Ushbu nufuzli musobaqada o'zbekistonlik charm qo'lqop ustalari ham sovrinli o'rinlar uchun kurash olib borishadi. Yurtdoshlarimiz musobaqada sovrinli o'rinlar uchun eng asosiy davogarlardan biri hisoblanishadi. 

O'zbekiston boks federaciyasi musobaqada munosib ishtirok etish maqsadida, jahon chempionatiga tayyorgarlikning eng so'nggi bosqichini aynan JCH o'tkaziladigan Ekaterinburg shahrida tashkil etdi. Bu g'oya shubhasiz terma jamoamizning moslashuv jarayoni uchun ijobiy tasir qiladi. 

O'quv-mashg'ulot yig'inlarida nafaqat jahon chempionatida ishtirok etuvchi bokschilarimiz, balki terma jamoamizdagi 2-3 raqamli charm qo'lqop ustalari ham qatnashishmoqda. Jismoniy va taktik tayyorgarlik, sparring janglarini tashkil etishda ushbu bokschilarimizning ham o'ziga yarasha o'rni bor. 

Qayd etish lozimki, hozirda Marat Qurbonov boshchiligidagi terma jamoa murabbiylaridan tashqari bokschilarimizning shaxsiy murabbiylari ham Ekaterinburgda bo'lib turishibdi. Bu ham musobaqa davomida bokschilarimizning faqat va faqat foydasi uchun xizmat qilishi shubhasiz. 

O'zbekiston boks federaciyasi matbuot xizmati