Bokschilarimizning Yangioboddagi yig'ini yakunlandi

5-18 iyun kunlari Toshkent viloyatining Yangiobod o'quv-mashg'ulot bazasidagi o'tkazilgan yig'inda 31-yozgi olimpiya o'yinlari yo'llanmasini  qo'lga kiritgan 10 nafar bokschimiz ishtirok etdi. Ikki haftalik mashg'ulotlarda odatdagidek umumjismoniy tayyorgarlikka etibor  qaratildi.

Bugundan Marat Qurbonov (shuningdek, murabbiylar Ravshan Xo'jaev, To'lqin Qilichev, Istam Kabinov) boshchiligidagi Hasanboy Do'smatov(49 kg), SHahobiddin Zoirov (52 kg), Murodjon Ahmadaliev (56 kg), Xurshid  Tojiboev (60 kg), Fazliddin G'oipnazarov (64 kg), SHahram G'iyosov (69 kg), Bektemir Meliqo'ziev (75 kg), Elshod Rasulov (81 kg), Rustam To'laganov (91 kg), Bahodir Jalolov (+ 91 kg) dan  iborat terma jamoamiz CHimyon dam olish bazasida jam  bo'lishgan.

Tog' yon bag'rida bokschilarimiz engil mashg'ulot bilan birga asosan tiklanish mashqlariga etibor qaratadilar. Bir hafta davomida jismoniy zo'riqishlardan holi bo'lgan olimpiyachilarimiz 27 iyun kuni o'z uylariga yo'l  olishadi.

Rio-2016 o'yinlari oldidan charm qo'lqop ustalarmizning ikkinchi bosqich yig'ini 1 iyul kuni yana Yangiobod bazasida boshlanadi. Ikki haftalik  yig'inda asosiy etibor sparing janglari, kuch, tezlik kabi sifatlarni rivojlantirishga qaratilishi kutilmoqda. Iyul oyining uchinchi haftasida esa terma jamoamizning so'nggi yig'ini olimpiya manzili Rio-de-Janeyro shahriga ko'chishi rejalashtirilgan.

Ulug'bek Hakimjonov tayyorladi