"Boysun bahori" festivali doirasida kurash va yugurish musobaqalari o'tkazildi FOTOREPORTAJ

O'zbekiston Respublikasi Vazirlar Mahkamasining 2022 yil 7 fevraldagi “Boysun bahori” xalqaro folklor festivalini tashkil etish va o'tkazish chora-tadbirlari to'g'risida”gi qaroriga muvofiq o'tkazilgan festivalda dunyoning 30 dan ortiq davlatidan martabali mehmonlar, soha mutaxassislari, sanatkorlar va muxlislar ishtirok etdi.

Padang kengliklarida yuzdan ortiq o'tov uylar o'rnatilib, milliy qadriyatlarimizga mos bezatilgani, Qoraqalpog'iston Respublikasi, Toshkent shahri va viloyatlar hamda Termiz shahri va tumanlardan kelgan hunarmandlar mahsulotlari, milliy taomlar ko'rgazmasi barchada katta qiziqish uyg'otdi. Turli sport musobaqalari, baxshi-oqinlar tanlovi, ot ustida kurash, chillak, arqon tortish, milliy kurash singari o'nga yaqin milliy xalq o'yinlari o'tkazilib, g'oliblar taqdirlandi.

Qizg'in bahslarga boy bo'lgan kurash bellashuvlarida mamlakatimizning barcha hududlaridan kelgan dongdor polvonlar o'zaro kuch sinashdi. +90 kilogramm vazn toifasidagi bahslarda Surxondaryo viloyati SHerobod tumanilik Muhammadkarim Xurramov g'olib bo'ldi va 20 million so'm pul mukofotini qo'lga kiritdi. Boshqa vazn toifasidagi g'olib polvonlar ham munosib rag'batlantirildi.

Alimurod MAMADAMINOV, o'z muxbirimiz