Bugun Elnur va Mahmud tarozidan o'tadi, ungacha esa vazn haydalmoqda FOTO

Hamyurtlarimiz tajribali mutaxassis, O'zbekiston Respublikasida xizmat ko'rsatgan murabbiy Rahmatjon Ro'zioxunov boshchiligida jangga hozirlik ko'rmoqdalar. 

Bugun bokschilarimiz ertangi jang oldidan tarozidan o'tishadi. Ungacha esa charm qo'lqop ustalarimiz mashg'ulotlarning so'nggi bosqichini Ekaterinburgda olib bormoqdalar. Tayyorgarlik doirasida vazn ham haydalmoqda.

G'oipovning raqibi rossiyalik Zurab CHaniev bo'ladi. 27 yoshli CHaniev 7ta jang o'tkazgan bo'lib, ularning 4tasida g'alaba qozongan. Ikkita jangda raqiblarini nokautga uchratgan. Ikki bor mag'lubiyat alamini totib ko'rgan, bittasi nokaut bilan. Yana bir jangda durang qayd etilgan. Mahmud G'oipov esa ikkita jang o'tkazgan va har ikkisida raqiblarini mag'lub etgan. Hozircha so'nggisi bo'lib turgan jangida armanistonlik Artush Xovxannisyanni ochkolar hisobiga ko'ra mag'lubiyatga uchratgan edi. 

Elnur Abduraimov ham mezbon bokschiga qarshi ringga ko'tariladi. Uning raqibi Dmitriy Xasiev bo'ladi. Xasiev shu kungacha 11ta jang o'tkazgan. Janglarining 8 tasida g'alaba qozongan (2 ta nokaut). Bitta jangda mag'lubiyatga uchragan va 2 ta durang qayd etgan.

Olamsport.com sayti ertangi jangda har ikki bokschimizga omad tilaydi.