Chess Classic Romania 2026. Sindarovda ketma-ket ikkinchi g'alaba. Bugun chempionlik uchun partiyalar!

Musobaqada yuqori reytingga ega o'n nafar grossmeyster bosh sovrin uchun kurash olib boryapti. Ular orasida "Nomzodlar turniri" g'olibi Javohir Sindarov ham bor. Hamyurtimiz 8-turda qora donalarda o'ynaganiga qaramay, musobaqa peshqadamlaridan niderlandiyalik Yorden van Forestni mag'lub etishga muvaffaq bo'ldi. Ketma-ket ikki g'alaba shaxmatchimizni chempionlik poygasiga qo'shilishiga xizmat qildi.  

Ruminiyalik Bogdan-Daniel Dik niderlandiyalik Anish Girini taslim etdi. Sakkizinchi turning qolgan partiyalari durang natija bilan yakunlandi. Hindistonlik Rameshbabu Praggnanandha franciyalik Maksim Vashe-Lagrav, germaniyalik Vinsent Keymer amerikalik Fabiano Karuana bilan murosaga kedi. Musobaqadan chiqib ketgan franciyalik Alireza Firuzdjaning raqibi amerikalik Uesli Soga texnik g'alaba yozildi. 

So'nggi tur oldidan Fabiano Karuana va Vinsent Keymer 5 ochkodan jamg'arib, turnir jadvalida qo'shhokimlik qilyapti. Kechagi g'alabasi evaziga Javohir Sindarov ochkolarini 4,5 taga etkazib oldi va qo'shimcha ko'rsatkichlarga ko'ra uchinchi o'ringa ko'tarildi. Javohirning bugungi raqibi Uesli So, shuningdek, Yorden van Forest hisobida ham 4,5 ochkodan bor. 

Bugun so'nggi 9-turda Javohir Sindarov oq donalarda amerikalik Uesli Soga qarshi bahs olib boradi. Agar bugun ham hamyurtimiz g'alaba qozonsa, u holda aniq sovrinli o'rinlardan birini egallaydi. Uchrashuvlar bizning vaqt bilan soat 18:00da boshlanadi. CHempion 100 000 dollarni qo'lga kiritadi.