CHirchiqda voleybol bo'yicha xotin-qizlar o'rtasida "S" ligasi final bellashuvlari o'tkazildi

Avval xabar berganimizdek, joriy yilning 26-28  noyabr kunlari CHirchiq olimpiya va paralimpiya sport turlariga tayyorlash markazi hamda CHirchiq davlat pedagogika universiteti sport zallarida voleybol bo'yicha  16-21 va 22-26  yosh toifasidagi xotin-qizlar o'rtasida "Ichki ishlar  vaziri kubogi " "S" ligasi respublika final bellashuvlari bo'lib o'tdi.

Qiziqarli va murosasiz o'tgan bellashuvlarning yakuniy natijalariga ko'ra, 16-21 yosh toifasidagi qizlar o'rtasida birinchi o'rinni Qashqadaryo viloyatining Muborak tumanidagi  "Sariq" MFY jamoasi qo'lga kiritdi. Ikkinchi o'rinni Toshkent viloyati Ohongoron shahridagi "Yoshlik" MFY jamoasi egallagan bo'lsa, uchunchi o'rin Samarqand viloyati Urgut tumanining "Sariqtepa" jamoasiga nasib etdi.

22-26 yosh toifasidagi xotin-qizlar o'rtasidagi bellashuvlarda faxrli birinchi o'rinni Toshkent viloyati O'rtachirchiq tumani "Fayzobod" MFY jamoasi, ikkinchi  o'rinni  Andijon viloyati Marhamat tumani "Durafshon" MFY jamoasi, uchunchi o'rinni Qoraqalpog'iston Respublikasi Mo'ynoq tumani "Jayxun" MFY jamoasi egalladi. 

Bellashuvlar yakuniga etgach, musobaqaning taqdirlash marosimi tashkil etildi. Yuqori saviyadagi taqdirlash marosimda  g'olib va sovrindorlarga diplom, medal, kubok va qimmatbaho esdalik sovg'alarni Toshkent viloyati yoshlar siyosati va sport bosh boshqarmasi boshlig'i Rustam Boboqulov va boshqa masullar tantanali tarzda topshirishdi.

SHuningdek, bellashuvlar doirasida Toshkent viloyati Yoshlar siyosati va sport bosh boshqarmasi boshlig'i tashabbusi bilan CHirchiq olimpiya va paralimpiya sport turlariga tayyorlash markazi hududida barcha jamoalar ishtirokida "Yashil makon" loyihasi asosida mevali va manzarali daraxt ko'chatlari ekilib,  o'ziga xos "Besh tashabbus olimpiadasi" bog'i yaratildi. 

Ilhom RAHMONOV tayyorladi.