De La Xoyya "Kanelo"ga murabbiyni almashtirishni maslahat berdi

"Unga bera oladigan yagona maslahatim - yangi murabbiy topish, - dedi De La Xoyya FightHype’ga bergan intervyusida. - Men unga faoliyatini yakunlash bo'yicha maslahat bera olmayman, chunki bu juda shaxsiy masala. Lekin unga yangi usullarni o'rgatadigan yangi murabbiy topishni maslahat berishim mumkin".

"Tasavvur qiling, u dunyodagi eng yaxshi murabbiylardan biri, masalan, Ronni SHilds bilan ishlaydi. U unga oyoqlarni qanday ishlatishni, tezlik va harakatchanlikdan foydalanishni va oyoqlarda hozirgidek og'ir bo'lmaslikni o'rgatadi", - deya qo'shimcha qildi De La Xoyya. - Uning tezligi va reflekslari bilan elita raqiblarga qarshi yana bir nechta jang o'tkazish imkoniyati bor, ammo unga yangi murabbiy kerak".

Malumot uchun, Saul Alvares ko'p yillardan buyon meksikalik murabbiy Eddi Reynoso bilan hamkorlik qilib keladi. Meksikalikning navbatdagi raqibi kim bo'lishi ham hozircha nomalum. De La Xoyyaning so'zlariga ko'ra, Kroufordning g'alabasi Alvaresning boshqa top raqiblar bilan jang qilish imkoniyati yo'qligini anglatmaydi.

"Agar "Kanelo" to'g'ri raqibga ega bo'lsa va unga qarshi turib, jangni boshlasa, uni nokautga uchratadi. Yani, men "Kanelo"ni "halokatga uchragan uchuvchi" demoqchi emasman. Mutlaqo yo'q. Hamma gap raqib tanlashda va muxlislaridan so'nggi dollarni tortib olishda".