03 iyu 09:44
Yangiliklar

Tennis

Dunyoning birinchi raketkasi "Uimbldon"da muvaffaqiyatli start oldi

Buyuk Britaniyaning London shahrida "Katta Dubulg'a" turkumiga kiruvchi Uimbldon turnirining asosiy to'r bahslari boshlandi.

Sayyoramizning birinchi raqamli tennischisi Iga Svyontek ilk davrada WTA reytingida 49-pog'onadan joy olgan amerikalik Sofiya Keninni 6/3, 6/4 hisobida mag'lubiyatga uchratdi. Tennis malikalarining o'zaro uchrashuvlaridagi hisob yiriklashdi - 4:0.

Bir soatu 19 daqiqa davom etgan bahsda Svyontek 6, Kenin 1 ta eys zarbasini amalga oshirgan. Qo'shxatolar Sofiyada ko'proq bo'ldi - 3 ga 1. Breyklar bo'yicha ustunlik xuddi shu ko'rinishda polshalik tennischi foydasiga bo'ldi - 3 ga 1!

Endi Iga Svyontek Uimbldon turnirining ikkinchi davrasida Petra Martichga qarshi kortga chiqadi. Xorvatiyalik tennischi o'z o'rnida birinchi bosqich uchrashuvida britaniyalik Francheska Jonsdan ustun keldi - 3/6, 6/1, 6/2.