Elnur Abduraimov: Licenziyam bo'lsada Olimpiadada ishtirok eta olmagandim, bu safar imkoniyatni boy bermoqchi emasman

Ushbu musobaqada ishtirok etuvchi bokschilar nomi hozircha malum qilinmagan. Lekin muxlislar -63 kg vazn toifasida ikki bokschi nomzodini ko'rishmoqda. Ular - JCH sovrindorlari Elnur Abduraimov va Iqboljon Xoldorovlardir. Ayni paytda yigitlarimiz Toshkent viloyatidagi o'quv-mashg'ulot yig'inlarida ishtirok etishmoqda. Biz licenzion turnir oldidan terma jamoamiz azosi Elnur Abduraimovning fikrlari bilan qiziqdik. 

"Havaskor boksga qaytishim qiyin bo'ldi, chunki professional boksda ham bungacha 5 ta jang o'tkazib, 5 ta g'alabaga erishgandim. Prof ringdagi oxirgi jangimni o'tkazganimga ancha bo'ldi. Avgust oyida yana havaskor boksga qaytdim. SHundan so'ng Rossiyada 1-2 ta jang o'tkazdim va mahorat oshirdim, Jahon chempionatida esa havaskor boks formasiga kirishga biroz vaqt etmadi, u erda amerikalik raqibga texnika tomonlama imkoniyatni boy berdim. CHunki, havaskor va professional boks orasida farq bor. Professional boksda kuchni raundlarga to'g'ri taqsimlay olish lozim. Havaskor boksda esa barchasi tezda hal bo'ladi. Jahon chempionati men uchun saboq bo'ldi. Ushbu chempionatdan so'ng men O'zbekiston birinchiligida ishtirok etdim va g'alaba qozondim. O'z navbatida ushu muvaffaqiyat menga katta kuch berdi. Hozirda o'quv-mashg'ulot yig'inlarida ishtirok etmoqdamiz. Nasib qilsa, sparring jang o'tkazaman va g'alaba qozonaman. CHunki, 2016 yilda licenziyam borligiga qaramay Rio Olimpiadasida ishtirok etish nasib qilmagan edi. Ushbu imkoniyatni qo'ldan boy bermoqchi emasman. Xudo xohlasa g'alaba qozonib, licenzion turnirda Olimpiada yo'llanmasini qo'lga kiritib, yaxshi natija bilan xalqimizni, yurtboshimizni xursand qilmoqchiman. 

Kimlardir "Elnur professional boksda faoliyatini davom ettirishi kerak" yoki shu kabi boshqa fikrlarni bildiradi. Xudo xohlasa, bu musobaqada men sensaciya ko'rsataman. Barchani ishonchini oqlayman. Xudo xohlasa, bu safar Olimpiadaga borish nasib qiladi. 

Avvalambor barchasi Ollohdan. Musobaqada ishtirok etish kimga nasib qilgan bo'lsa o'sha boradi. Umid qilamanki, u erga yaxshi kayfiyatda borib, yaxshi natijalar bilan yurtimizga qaytamiz", - dedi Elnur Abduraimov.