Elshod Rasulovni tabriklaymiz!

Elshod Rasulov 1986 yil Farg'ona viloyatining Qo'qon shahrida tavallud topgan. Ko'p yillar boks terma jamoamiz sharafini munosib himoya qilgan qahramonimiz avvaliga qilichbozlik sport turi bilan professional tarzda shug'ullangan. Biroq, boks uni o'ziga ohangrabodek tortgan. 2004 yilda yoshlar o'rtasida jahon chempioni, 2006 yil harbiylar o'rtasidagi jahon birinchiligi g'olibi, ikki karra Osiyo chempioni, ikki karra Osiyo o'yinlari oltin medal sohibi, uch karra jahon chempionati sovrindori kabi yutuqlarga erishgan, bokschilik faoliyatida uch marta olimpiya o'yinlarida ishtirok etgan. 2012 yil London olimpiadasida O'zbekiston delegaciyasi bayroqdori bo'lgan Rasulov "Mehnat shuhrati" ordeni, "O'zbekistonda xizmat ko'rsatgan sportchi" unvoni bilan taqdirlangan.

Bugungi kunda ayollar boks terma jamoamiz murabbiylar shtabida faoliyat olib borayotgan faxrimiz 34 yoshni qarshi olmoqda. Fursatdan foydalanib  saytimiz xodimlari va muxlislari nomidan Elshod Rasulovni tug'ilgan kuni bilan muborakbod etamiz. Unga metindek mustahkam sog'lik, oilaviy baxt hamroh bo'lsin deymiz. O'zi erishmagan olimpiada shohsupasi shogirdlariga nasib qilishiga tilakdoshmiz!

Sarvinoz Raxmonqulova