Ertaga xalqning kayfiyati Sizlarga bog'liq bo'lgan kun!

Yangilangan boks terma jamoasi azolaridan ko'pchilik bunday ijobiy natijani kutmagan edi. Ko'plab charm qo'lqop ustalarimizning professional boksga o'tib ketishlaridan keyin mutaxassislar Osiyo chempionatida sust qatnashishimizni bashorat qilishdi. To'g'ri, natija 2017 yilgi Osiyo chempionatidek bo'lmadi. Lekin O'zbekiston terma jamoasi eng ko'p bokschi bilan finalda qatnashadigan bo'ldi. To'rt nafar bokschi bilan Hindiston ikkinchi, Qozog'iston esa shuncha ishtirokchi bilan uchinchi bo'ldi. 

Boks tarixiga nazar tashlasak, ilk chempionat 1963 yili bo'lib o'tgan. Qizig'i shundaki, unda ham bugungi kabi Tailand mezbon bo'lgan. Yaponiya terma jamoasi 3 ta oltin bilan umumjamoa hisobida birinchi o'rinni olgan. Keyingi 4 ta Osiyo chempionatida Janubiy Koreya yaqqol peshqadam bo'lib oldi. 1994 yildan etiboran Markaziy Osiyo vakillari ham Osiyo chempionatida ishtirok eta boshladilar. SHu kungacha Qozog'iston terma jamoasi umumjamoa hisobida 6 marotaba Osiyoda birinchi bo'lgan. O'zbekiston esa 4 marotaba! 

2017 yil O'zbekiston Janubiy Koreyaning 52 yillik rekordini "nokaut" qildi. 1965 yil Janubiy Koreya 8 ta oltin medal bilan umumjamoa hisobida birinchi o'rinni qo'lga kiritgan, 1987 yil Quvaytda bo'lib o'tgan musobaqada ular o'z rekordlarini takrorlagan edilar. 2017 yil O'zbekiston Olimpiada chempionlarining yordamida 9 ta oltin medalni qo'lga kiritgani muxlislarning yodidan chiqmagan bo'lsa kerak. Bu rekordni yangilash uchun endi uzoq yillar talab etilsa ajab emas. 

Biz esa Qozog'iston bilan o'rtadagi farqni qisqartirish uchun yaxshigina imkoniyatga ega bo'lib turibmiz. Avvalo, maqsad - 5 ta oltin, lekin 4 tasiga ham xafa bo'lmaymiz. Bu umumjamoa hisobida 1-o'rinni qo'lga kiritishimiz uchun etadi. CHunki 5 ta jangdan 2 tasida Hindiston vakiliga qarshi ringga ko'tarilamiz. O'z-o'zidan ularni mag'lubiyatga uchratsak torozi pallasi biz tomonda bo'ladi.

Finalga qadar etib borgan bokschilarimizning mushtlari ertaga raqiblarimizdan ochko olish uchun harakatga kelishiga ishonamiz. Ertaga hakamlar tomonidan ochkolar elon qilingach, aynan bizning "qo'llarimiz" balandga ko'tarilishini tilab qolamiz. CHarm qo'lqop ustalarimiz ham Vatanga Osiyo chempionlari sifatida qaytish uchun bor imkoniyatlarini ishga solishadi degan umiddamiz. Barcha bokschilarni hurmat qilgan holda, ertaga Bobo Usmon Baturovdan nafaqat oltin, balki yorqin jang ham kutaman. Bu bokschini Bokuda bo'lib o'tgan Islom birdamlik o'yinlarida namoyish etgan janglarini unuta olmasam kerak. Qizlarimiz ham chakki qatnashmadilar, ularga bugun biroz omad etishmadi.

Qisqasi, Nodir, Mirazizbek, Bobo Usmon, Sanjar va Bahodir, ertangi kun kayfiyati Sizlarga bog'liq, bu esa "mushtingizdan" keladi, biz bunga ishonamiz!

Nodirxo'ja Yuldashev