FIFA reytingi. O'zbekiston Osiyoning oltinchi jamoasiga aylanadi

O'zbekiston terma jamoasi 2026 yilgi jahon chempionati saralash bosqichi doirasida Qirg'iz Respublikasini o'z maydonida 1:0 hisobida mag'lub etdi. Mazkur g'alaba Timur Kapadze shogirdlariga turnir jadvalida 3 ochko bilan bir qatorda FIFA reytingida 7 ochko olib keldi. Buning natijasida "oq bo'rilar" Iroqni ortda qoldirdi va bir pog'ona yuqorilab, 57-o'ringa ko'tarilib oldi. 

Iroq esa o'zidan pastroqda joylashgan Kuvayt bilan durang o'ynashi oqibatida FIFA reytingida salkam 7 ochkoni boy berdi va ikki pog'ona pastlab, 58-o'ringa tushib ketdi. SHu tariqa, O'zbekiston terma jamoasi OFKning eng kuchli oltinchi jamoasiga aylandi.

Markaziy Osiyo mamlakati navbatdagi uchrashuvni 25 mart kuni Eronga qarshi o'tkazadi. Mazkur bellashuvdagi muvaffaqiyat jamoaga yana 17 ochko taqdim etishi mumkin. Mag'lubiyat esa yana Iroqni o'tkazib yuborishga sabab bo'lishi mumkin. "Mesopotamiya sherlari" esa Falastin maydonida g'alaba qozonish orqali o'z o'rniga qaytishga harakat qiladi.

Eslatib o'tamiz, FIFA reytingi rasman aprel oyining boshlarida yangilanadi.