Gamburgga bormagan Do'smatovning murabbiyi Hasanboy haqida nima dedi?

Hasanboyni Andijon Olimpiya zaxiralari kollejidan to Olimpiada chempioni bo'lgunga qadar tarbiyalagan shaxsiy murabbiyi Ziyatdinbek Toygonboev viza bilan bog'liq muammo sabab Germaniyaga bora olmadi.

Bilmadik, bu hakamlar Toyg'onboev Hasanning yonida bo'lganida ham baribir o'z ishlarini qilishlari mumkin edi. Lekin bilganimiz Do'smatovning shaxsiy murabbiyi Germaniyada ikki haftadan oshiq davom etgan so'nggi o'quv-mashg'ulot yig'inida ham, jahon chempionatida ham shogirdining yonida bo'lmadi.  

Biz murabbiydan shogirdining finaldagi jangi va umuman charm qo'lqop ustalarimizning jahon chempionatidagi ishtiroki yuzasidan intervyu oldik.

- Ziyatdinbek aka, jahon chempionatiga bormasligingizga nima sabab bo'ldi?

- Afsuski, muhim pallada shogirdimning yonida bo'la olmadim. Bunga viza ololmaganim sabab bo'ldi. Fuqarosi bo'lmagan shaxsga viza berish masalasi juda ham qiyin ekan. Viza taqdim etish jarayoni cho'zilib ketishi natijasida bunga ulgurolmadim. Tabiiyki, buning natijasida Gamburg shahrida o'tkazilgan 20 kunlik o'quv-mashg'ulot yig'inidan ham chetda qoldim. Balki, borganimda yaxshi bo'larmidi? O'ylashimcha, shaxsiy murabbiy bunday katta nufuzdagi musobaqalarda shogirdining yonida bo'lishi kerak. Nihoyat, kecha menga O'zbekiston fuqarosi degan pasport berishdi. Endi hammasi yaxshi bo'ladi.

- Hasanboyning final jangi haqida nima deysiz?

- SHogirdim jangni o'z foydasiga hal qilgan edi. Hakamlar nohaqlik qilishdi.

- Jang oldidan qanday ko'rsatma bergan edingiz?

- Jang oldidan beriladigan ko'rsatma bilan bevosita jang ketayotganda beriladigan ko'rsatma o'rtasida katta farq bor. Vaziyatni ko'ra bila turib, shogirdingizga taktikani o'zgartirish haqida gapirasiz. Kubalik bokschini pressingda ushlab turish, raqibga bir kirganda 2-3ta zarba berib, himoyaga qaytish kerakligini aytgandim. Raqibga ko'p bosim uyushtirsa, kubalik shuncha tez charchab, o'zini nazorat qila olmay qolardi. Final jangida g'alaba qozondik, lekin Hasanboyga qarshi ovoz bergan 3 nafar hakam yaxshi ish qilishmadi. Hech bo'lmasa ularning biri bizga haqqoniy g'alabani taqdim etganida, Hasanboy Germaniyadan oltin medal bilan qaytardi.

- Jahon chempionatidagi umumiy ishtirokimiz haqida nima deysiz?

- Umumjamoa hisobida birinchi o'rinni egallashimiz kerak edi. Hasanboydan tashqari, 52, 75 va 81 kg vazn toifalaridagi bokschilarimiz ham chempion bo'lishga haqli edilar. Lekin umumjamoa hisobida ikkinchi o'rin ham yomon natijasi emas.