G'oipov va Abduraimov Ekaterinburgga jo'nab ketdi FOTO

Hamyurtlarimiz tajribali mutaxassis, O'zbekiston Respublikasida xizmat ko'rsatgan murabbiy Rahmatjon Ro'zioxunov boshchiligida safarga otlanishdi. Har ikki bokschimiz 23 mart kuni Rossiyaning Ekaterinburg shahrida prof boksdagi uchinchi janglarini o'tkazishadi. 

G'oipovning raqibi rossiyalik Zurab CHaniev bo'ladi. 27 yoshli CHaniev 7ta jang o'tkazgan bo'lib, ularning 4tasida g'alaba qozongan. Ikkita jangda raqiblarini nokautga uchratgan. Ikki bor mag'lubiyat alamini totib ko'rgan, bittasi nokaut bilan. Yana bir jangda durang qayd etilgan. 

Mahmud G'oipov esa ikkita jang o'tkazgan va har ikkisida raqiblarini mag'lub etgan. Hozircha so'nggisi bo'lib turgan jangida armanistonlik Artush Xovxannisyanni ochkolar hisobiga ko'ra mag'lubiyatga uchratgan edi. 

Elnur Abduraimov ham mezbon bokschiga qarshi ringga ko'tariladi. Uning raqibi Dmitriy Xasiev bo'ladi. Xasiev shu kungacha 11ta jang o'tkazgan. Janglarining 8 tasida g'alaba qozongan (2 ta nokaut). Bitta jangda mag'lubiyatga uchragan va 2 ta durang qayd etgan.