Hamyurtimizga London Olimpiadasining bronza medali olib berilishi mumkin

Aniqrog'i, 2012 yilgi London Olimpiadasida ishtirok etgan besh nafar og'ir atletikachidan olingan tahlillar Xalqaro Olimpiya qo'mitasi tomonidan qayta o'tkazilgan doping tekshiruvida ijobiy natija bergan.

Qayd etilishicha, doping testiga ijobiy reakciya bergan namunalardan biri o'sha musobaqada 105 kg vazn toifasida to'rtinchi o'rinni olgan o'zbekistonlik Ruslan Nurudinovga tegishli. 

SHuningdek, 2012 yilgi olimpiya o'yinlarining -105 kg vazn toifasidagi chempioni ukrainalik Aleksey Toroxtiy, -56 kg.da bronza medali sohibi ozarbayjonlik Valentin Xristov, mos ravishda 8- va 14-o'rinni egallagan belaruslik Nikolay Novichkov hamda armanistonlik Melin Daluzyan ham ushbu qora ro'yxatda bor.

Xalqaro og'ir atletika federaciyasi nomlari tilga olingan besh sportchini vaqtinchalik har qanday faoliyatdan chetlashtirgan. Agar qaror o'z kuchida qoladigan bo'lsa, o'sha Olimpiadada 5-o'rinni egallagan yana bir hamyurtimiz Ivan Efremovga bronza medali taqdim etiladi. Eronlik altet Olimpiada chempioniga aylanadi, polshalik Bonk esa o'zining bronzasini kumushga almashtirib oladi. 

Malumot uchun, bir necha oy oldin Ivan Efremov AQSHga jo'nab ketgan. Bizdagi malumotlarga ko'ra, hozirda u Amerika klublarining biri bilan shartnoma imzolagan va ushbu klub sharafini himoya qilmoqda. 

  

Avvalroq so'nggi olimpiya o'yinlari davomida doping istemol qilish holatlari og'ir atletikachilar orasida ko'plab kuzatilayotgani tufayli sportning bu turi Olimpiada dasturidan chiqarib yuborilishi mumkinligi malum bo'lgandi. Ushbu masala noyabr oyi oxirida Xalqaro Olimpiya Qo'mitasi Ijroqo'mida muhokama qilingan, ammo yakuniy qarorni qabul qilish keyinroqqa qoldirilgan.