Hasanboy Do'smatov finalga chiqdimi? Iqboljon Xoldorovchi?

Bugun mamlakat chempionatida yarim final janglari o'tkazilib, oltin medal uchun ringga ko'tariladigan 16 nafar bokschining nomi malum bo'ldi. Eng engil, yani -52 kg vazn toifasidagi markaziy jang Rio Olimpiadasi chempioni Hasanboy Do'smatov hamda istedodli bokschi Abrorjon Qodirov o'rtasida bo'lib o'tdi. 

Qiziqarli kechgan jangda Do'smatov raqibini 4:1 hisobida mag'lub etdi. Ikkinchi yarim final bahsida esa Toshkent viloyati vakili Xudoynazar Fayzov va poytaxtlik Nodirjon Mirzaahmedov to'qnash kelishdi. Jangda 5:0 hisobida zafar quchgan Fayzov ertaga finalda Hasanboyga raqiblik qiladigan bo'ldi.

-69 kg vazn toifasida chempionlik uchun kurashayotgan jahon chempionatining kumush medali sovrindori Iqboljon Xoldorov final ostonasida farg'onalik Fazliddin Meliboevga imkoniyat qoldirmadi - 5:0. Ikkinchi yarim finalda Bobo-Usmon Baturov Jahongir Rahmonovdan 5:0 hisobida ustun keldi.