Hasanboy Do'smatov, Iqboljon Xoldarov va boshqa bokschilarimiz jang qilishi kerak bo'lgan Qirg'izistondagi turnir bu safar birato'la bekor bo'ldi

Musobaqada Hasanboy Do'smatov, Iqboljon Xoldarov, Mirazizbek Mirzahalilov kabi o'zbekistonlik charm qo'lqop ustalari jang o'tkazishlari belgilangandi. Biroq bu safar ham musobaqa kechiktirildi va keyinroq turnir butunlay bekor bo'lgani malum bo'ldi.

"SAIKOULUSH’ning Qirg'izistondagi turnir bekor qilinishi va keyingi tadbirlar haqidagi rasmiy bayonoti

So'nggi vaqtlarda tayyorgarlik ishlari olib borilgan Qirg'izistondagi SAIKOULUSH turniri rasman bekor qilinganini malum qilishga majburmiz.

Ushbu oqshomni intiqlik bilan kutgan barcha boks muxlislaridan, shuningdek homiylar, hamkorlar va barcha aloqador tomonlardan etkazilgan noqulaylik va xavotir uchun chin dildan uzr so'raymiz. Loyiha asoschisi nomidan SAIKOULUSH tashkiloti ichidagi joriy vaziyat va turnir bekor qilinishiga olib kelgan sabablarga izoh berishni istardik.

2024 yil avgust oyida 3150FIGHT va LUSHBOMU loyihalari birlashib, 3150xLUSHBOMU (hozirgi SAIKOULUSH) nomi ostida faoliyatning yangi bosqichini boshladi. Bir tomondan, LUSH jamoasi musiqa va ko'ngilochar elementlarga boy yorqin shou-dasturlar tashkil etib, boks olamiga yangi auditoriyani jalb qildi. Boshqa tomondan, 3150FIGHT professional boksning yangi formati ustida ishlab, jahon darajasidagi chempionlik janglarini tashkil etdi. Ushbu birlashuv har ikki tomonning kuchli jihatlarini uyg'unlashtirib, yanada yuqori darajaga chiqish maqsadida tashkil qilingan edi.

Ushbu hamkorlik doirasida LUSH Co., Ltd. kompaniyasi turnirlarni moliyalashtirish va umumiy boshqaruv uchun javob bergan bo'lsa, boks industriyasidagi aloqalar va tajribaga ega bo'lgan bizning tomon matchmeyking hamda tashkilotning sport qismi bilan shug'ullandi. SHu vaqt ichida biz 10 ta turnir o'tkazishga muvaffaq bo'ldik, jumladan jahon darajasidagi 7 ta jangni tashkil etdik. Ammo birgalikda eng yaxshi tadbirlarni yaratish o'rniga, vaziyat bunday achinarli natijaga olib keldi va biz bundan chuqur afsusdamiz. Bekor qilingan turnirda ishtirok etishi kerak bo'lgan bokschilarga kelsak, hozir biz ularning mehnati va tayyorgarligi behuda ketmasligi uchun imkon qadar tezroq yangi maydonlar va chiqish imkoniyatlarini taqdim etish ustida ishlayapmiz. 

Loyiha asoschisi sifatida, ayni vaqtda muxlislar va sportchilarga to'liq ishonch bilan: «Turnir albatta bo'lib o'tadi», — deb ayta olmayotganimiz biz uchun og'ir.

Yana bir bor ushbu vaziyat tasir qilgan barcha sportchilar, muxlislar, hamkorlar va boshqa barcha insonlardan samimiy uzr so'raymiz", deyiladi tashkilot xabarida.