Humoyun Sultonov birinchi raketkani mag'lub etdi

Mukofot jamg'armasi 36 900 evrodan iborat ushbu turnirda hamyurtimiz Humoyun Sultonov ham ishtirok etyapti. Quvonarlisi, mamlakatimizning birinchi raketkasi ilk davrada turnirda birinchi raqam ostida saralangan argentinalik Marko Trungellitini mag'lub etishni uddaladi. 

Ikki soatu 25 daqiqa davom etgan bahsda Sultonov irodali g'alabaga erisha oldi - 3/6, 7/6(4), 6/2. Ikkala tennischi ham 5 tadan eys zarbasini amalga oshirgan. Qo'shxatolar Humoyunda ko'proq bo'ldi - 3 ga 1. Bu tennischilarning o'zaro o'tkazgan ilk uchrashuvi edi. 

Taqqoslash uchun, Marko Trungelliti ayni paytda dunyoning 151-raketkasi bo'lib turibdi. Sultonov esa ATP reytingida 309-pog'onadan joy olgan. Bugun tennischimiz 1/8 finalda italiyalik Lorenco Justinoga qarshi kortga chiqadi. Bu tennischi reytingda 343-o'rinni band etgan.