Humoyun Sultonov iroda ko'rsatib, Germaniya turnirida ham finalga yo'l oldi!

Avvalroq, musobaqada ishtirok etayotgan O'zbekistonning birinchi raqamli tennischisi Humoyun Sultonov ham yarim finalga chiqqani haqida xabar bergan edik.

Sultonov bugun final chiptasi yo'lida belgiyalik Gote Onklinga qarshi kortga chiqdi. 2 soat-u 35 daqiqaga cho'zilgan o'yin g'olibi uch setda aniqlandi. Unda Humoyun Sultonov kambek evaziga zafar quchdi — 4:6, 6:3, 6:4.

Malumot uchun, Humoyun Sultonov ayni damda ATP reytingida 309-o'rinni band etib turibdi. Belgiyalik tennischi esa dunyo reytingida 259-o'rinda edi.

Ertaga namanganlik tennischimiz mukofot jamg'armasi 25 000 dollarni tashkil etuvchi M25 Kassel turnirining finalida kortga chiqadi. Unga bu yo'lda yana bir Belgiya vakili — Rafael Kollinon (ATP-258) raqib bo'ladi. O'yin Toshkent vaqti bilan 13:00 da start olishi belgilangan.

Eslatib o'tamiz, Humoyun iyul oyi boshida Belgiyaning Bryussel shahrida tashkil etilgan M25 turnirida qatnashib, finalga qadar etib borgan edi va vice-chempionga aylangan edi.