Ikki bokschimiz leytenant unvoni bilan taqdirlandi

Tantanada Mudofaa vazirligi, Jismoniy tarbiya va sport vazirligi, Milliy Olimpiya qo'mitasi rahbariyati ishtirok etdi.

Takidlash kerakki, joriy yilda Mudofaa vazirligi sport klubi faollari erishgan yutuqlar har qancha etirofga arzigulik, deyiladi xabarda.

Jumladan, navbatdagi «leytenant» harbiy unvoni topshirilgan kontrakt bo'yicha harbiy xizmatchi, oddiy askar Bektemir Meliqo'ziev joriy yilda AQSHda professionallar o'rtasida tashkil qilingan uchta jang g'olibi bo'ldi. Xuddi shunday navbatdagi «leytenant» harbiy unvoni topshirilgan kontrakt bo'yicha harbiy xizmatchi, oddiy askar Mirazizbek Mirzaxalilov bir qator xalqaro nufuzli chempionatlarda g'oliblikka erishdi.

Qurolli Kuchlar xizmatchilari Nikita Rafalovich va Adhamjon Ergashev bir necha xalqaro turnirlar g'olibi, Jahon chempionati sovrindori bo'lish barobarida 2020 yili Yaponiyada o'tkaziladigan Olimpiya o'yinlarida ishtirok etish uchun licenziyani qo'lga kiritgan.

Mudofaa vazirligi sport klubi faoli Nigora Tursunqulova esa joriy yilning o'zida «Katta dubulg'a» tasnifidagi xalqaro turnirning bronza medali sovrindori, «Turkish Open» hamda «Rossiya Open» xalqaro turnirlarining g'olibligiga sazovor bo'lgan.

Mayor Anvar Muqimov esa jiu-jitsu sport turi bo'yicha Jahon chempionatida oltin medalni qo'lga kiritib, O'zbekiston tarixida ilk jahon chempioni bo'ldi. SHuningdek, harbiy sportchilarning ko'pchiligi Uxan shahrida bo'lib o'tgan VII umumjahon harbiy o'yinlari g'oliblari safidan o'rin olgan.

Mudofaa vazirligi sport klubi azolari 2019 yil davomida respublika va xalqaro miqyosdagi chempionat hamda musobaqalarda, jami 800 ta medalni qo'lga kiritgan, shundan 265 tasi xalqaro turnirlarda erishgan g'alabalari natijasidir.

Nafaqat O'zbekistonda, balki xalqaro maydonda ham tan olingan sportchilar bir dasturxon atrofida yuqoridagi voqealarning guvohi bo'lib o'tirgan poytaxtdagi 102-maxsus maktab internat o'quvchilariga o'zlarining sovg'alarini topshirdi.

«Yangi yil arafasida berilgan sovg'alar bolajonlarning ko'nglini xushnud qildi. Ayniqsa, o'zbek va jahon adabiyoti durdonalaridan iborat kitoblar jamlanmasi ularni shod qildi. Tantanalardan so'ng o'quvchilar uchun Mudofaa vazirligi sport klubida bayram tadbiri tashkil qilindi», — deyiladi xabarda.