Jahon chempionati. Birgina Afruzada g'alaba, Javohirda mag'lubiyat

Bu galgi jahon chempionati 8, 10 hamda 12 yoshli shaxmatchilar o'rtasida tashkil etilyapti. Dunyoning 100ga yaqin mamlakatidan istedodli shaxmatchilar ishtirok etayotgan musobaqada hamyurtlarimiz – aka-uka jahon chempionlari Islombek va Javohir Sindarov, Osiyo chempioni Humoyun Bekmurodov, qizlardan Maftuna Bobomurodova, Yuliya Xegay va Afruza Hamdamovalar yurtimiz sharafini himoya qilishyapti.

Sakkiz yoshlilar o'rtasidagi musobaqada imkoniyatini sinab ko'rayotgan Humoyun Bekmurodov kanadalik Kevin Jongga yutqazib qo'ydi.  

O'n yoshli shaxmatchilar bahsida birinchi raqam ostida tasniflangan Islombek Sindorov oq donalarda o'ynashiga qaramay, ozarbayjonlik Suleyman Suleymanli bilan durang o'ynadi.

O'n ikki yoshli shaxmatchilar musobaqasida ikkinchi tartib raqamli ishtirokchi bo'lgan Javohir Sindorov 2-turda kutilmaganda AQSH vakili Aydin Turgutga yutqazib qo'ydi.

Qizlarimizdan Afruza Hamdamova ikkinchi g'alabasini qo'lga kiritdi. U reytingda o'zidan yuqorida turgan rossiyalik Glafira Kulishni taslim etdi. Yuliya Xegay turkiyalik Sila Kaglar, Maftuna Bobomurodova esa amerikalik Roshel Vu bilan murosaga keldi.