Jahon chempionatidan qaytgan polvonlarimiz tantanali kutib olindi FOTOGALEREYA

Jahon chempionatida muvaffaqiyatli ishtirok etgan polvonlarimiz 1 ta oltin, 5 ta kumush, 6 ta bronza, jami 12 ta medalni qo'lga kiritib, qirqdan ortiq  davlatdan ishtirok etgan sportchilar orasida umumjamoa hisobida kuchli beshlikdan o'rin egallashdi. 

Terma jamoamiz delegaciyasi Qozon shahridan qaytib keldi. Polvonlarimiz Islom Karimov nomidagi Toshkent xalqaro aeroportida keng jamoatchilik tomonidan tantanali tarzda  kutib olindi. Biz esa fursatdan foydalanib, jahon chempionatida medallarga ega bo'lgan sportchilarning taassurotlari bilan qiziqdik.  

Begoyim RAHIMBOEVA, jahon chempionatining 76 kg. vazn toifasida kumush medal sohibasi (Xorazm): 

- Raqiblarimiz ham belbog'li kurashni yaxshi o'zlashtirgani bois ushbu jahon chempionatida kuchli uchlikdan joy olish oson kechmadi. Maqsadim oltin medalni qo'lga kiritish edi. Final bosqichida raqibim kuchli ekaniga shubha qilmagandim. Oxirgi daqiqalarda omad mendan yuz o'girdi shekilli, imkoniyatni boy berib qo'ydim. Biroq, bundan afsuslanganim yo'q. SHunday nufuzli musobaqaning finalida kurash tushganimdan xursandman. Keyingi xalqaro musobaqalarda albatta birinchi bo'lish uchun mashg'ulotlarga jiddiy kirishaman. Avvalo, bizga shunday keng imkoniyatlar yaratilayotgani uchun terma jamoamiz nomidan, jahon chempionatida uchinchi o'rinni egallagan eng yaqin dugonam Ullijon Davlatova nomidan Prezidentimizga rahmatlar aytamiz. Qolaversa, ota-onamga, yoshligimizdan belbog'li kurashga oshno etgan, ushbu sport turini viloyatda keng targ'ib qilib kelayotgan jonkuyar ustozim Bekbergan Boltaevga, O'zbeksiton belbog'li kurash federaciyasi raisi, xalqaro belbog'li kurash federaciyasi (borba na poyasax, IBWA) vice-prezidenti Ravshan Dastirovlarga o'z minnatdorchiligimizni bildiramiz.

Munisa ALISHEROVA, jahon chempionatining 52 kg. vazn toifasida bronza medali sohibasi (Qashqadaryo): 

- Jahon chempionatida ilk bor ishtirok etishim va uchinchi o'rinni egallab, bronza medaliga ega bo'lganimdan afsusda emasman, aksincha xursandman. Belbog'li kurash viloyatimizda ommalashib borayotgani bois, sekin asta xalqaro musobaqalar g'olib va sovrindorlarimiz ko'paymoqda. Men ham mamlakatimizga, viloyatmizga medal olib kelganimdan mamnunam. Albatta, Qashqadaryo viloyatiga belbog'li kurashni rivojlantirishda tashabbus ko'rsatgan  viloyat belbog'li kurash federaciyasi raisi, CHiroqchi tuman 1-sonli bolalar-o'smirlar sport maktabi direktori, belbog'li kurash bo'yicha xalqaro toifadagi hakam Farhod aka Jumanovga, O'zbekiston belbog'li kurash federaciyasiga o'z minnatdorchiligmni izhor etaman. Qolaversa, shu sport turini mukammal darajada o'rgatib kelayotgan murabbiyim Bahriddin Yarmatovga, CHiroqchi tuman 1-sonli BO'SMning fidoyi murabbiylariga tashakkurlar deyman. Maqsadim - bronza medalini oltinga aylantirish va buning uchun yanayam mashg'ulotlarga zo'r beramiz.

Ilhom RAHMONOV tayyorladi