Jahon rekordchisi hamda terma jamoa azolari tantanali kutib olindi

Samolyot yo'lovchilari safidan og'ir atletika bo'yicha yaqinginada Tailandning Bangkok shahrida bo'lib o'tgan jahon chempionatidan sovrindor bo'lib qaytayotgan O'zbekiston terma jamoasi azolari ham o'rin olishgandi.

Eslatib o'tamiz, ushbu jahon chempionatida vakillarimiz uchta medalga sazovor bo'lishdi. Jumladan, erkaklar o'rtasida -67 kg vazn toifasida Adhamjon Ergashev siltab ko'tarish mashqida kichik bronza, -109 kg vaznda esa Akbarjon Jo'raev ham siltab ko'tarish mashqida kichik kumush medalni qo'lga kiritdi. 

Ayollar o'rtasida -55 kg vazn toifasida supachaga ko'tarilgan terma jamoamizning umidli sportchilaridan biri Muattar Nabieva ham yakunda sovrindorga aylandi. U siltab ko'tarish mashqlarida kichik bronza medaliga ega chiqdi. Darvoqe, Akbarjon Jo'raev tomonidan qayd etilgan natija yoshlar o'rtasida jahon rekordi sifatida tarixga kirdi.

Takidlash kerak, jahon chempionati bahslarida O'zbekiston o'zining mustaqillik yillaridagi eng yosh tarkibi bilan ishtirok etgan bo'lishiga qaramay vatanimizga uchta medal bilan qaytishdi. Bundan anglash mumkinki, O'zbekiston og'ir atletikasining ertasi ishonchli qo'llarda.

Bugun Toshkent xalqaro aeroportiga og'ir atletikachilarimizni kutib olish uchun Jismoniy tarbiya va sport vazirligi hamda Milliy olimpiya qo'mitasining mutasaddilari, O'zbekiston kasaba uyushmalari federaciyasi Markaziy Kengashi xodimlari, O'zbekiston og'ir atletika federaciyasi vakillari hamda sportchilarning oila azolari, yaqinlari va OAV xodimlari hozir bo'lishdi.