Jo'raev jamoamizning Xalqaro birdamlik musobaqasidagi ishtirokiga chiroyli yakun yasadi

Kecha musobaqaning so'nggi kun dasturida og'ir vaznli polvonlar ishtirok etishdi. Ushbu kun dasturida ko'pchilikning diqqat-etibori -109 kg vazn toifasida qatnashgan Akbar Jo'raevning chiqishiga qaratildi. Vakilimiz dast ko'tarish mashqida 189 kg, siltab ko'tarish yo'nalishida esa 221 kg og'irlikni zabt etdi. 

SHubhasiz, bu vazndagi qolgan sportchilar Jo'raevning natijasini takrorlay olishmadi va vakilimiz 3 ta oltin medalga sazovor bo'ldi. Bu yil 21 yoshni qarshi oladigan sportchimiz dast ko'tarish mashqida o'zining shaxsiy rekordini 1 kilogrammga yangilashga muvaffaq bo'ldi.

Xalqaro birdamlik musobaqasi.
Erkaklar, -109 kg.:
1. Akbar Jo'raev (O'zbekiston) – 410 kg (189 kg, 221 kg)
2. Ibragim Bersanov (Qozog'iston) – 387 kg (181 kg, 206 kg)
3. Ki Sam Jeong (Janubiy Koreya) – 361 kg (171 kg, 190 kg)

-102 kilogramm vazn toifasida Umarbek SHohnazarov bronza medallari bilan taqdirlandi. Takidlash joiz, yosh polvonimiz bu toifada o'zidan ancha nomdor bo'lgan Ilya Ilin va Fares Elbax kabi atletlar bilan munosib raqobatlashdi.

Xalqaro birdamlik musobaqasi.
Erkaklar, -102 kg.:
1. Ilya Ilin (Qozog'iston) – 355 kg (160 kg, 195 kg)
2. Fares Elbax (Qatar) – 353 kg (159 kg, 194 kg)
3. Umarbek SHohnazarov (O'zbekiston) – 341 kg (155 kg, 186 kg)

SHuningdek, Dolera Davronova +87 kilogramm vazn toifasida kumush medallarni qo'lga kiritdi.

Mazkur musobaqa yaqinlashib kelayotgan Tokio Olimpiadasi yo'lida qimmatli reyting ochkolarini taqdim qilishi bilan katta ahamiyat kasb etar edi. Vakillarimiz bunday muvaffaqiyatli ishtirok bilan Olimpiada yo'lida o'z hisoblariga qimmatli reyting ochkolarini yozdirib qo'yishmoqda.