Kollinz - Charleston Open chempioni!

Musobaqa bosh sovrini amerikalik Daniel Kollinzga nasib etdi. Finalgacha WTA reytingida 22-pog'onadan joy olgan Kollinz bosh sovrin uchun kechgan bahsda dunyoning 11-raketkasi, rossiyalik Darya Kasatkinani ortiqcha qiyinchiliksiz mag'lubiyatga uchratdi - 6/2, 6/1. 

Bu bilan Daniel o'zaro uchrashuvlardagi hisob muvozanatini ham tiklab qo'ydi - 2:2. Etmish olti daqiqa davom etgan bahsda Kasatkina 1, Kollinz 2 ta eys zarbasini amalga oshirgan. Qo'shxatolar Daryada ko'proq bo'ldi - 5 ga 2. Amerikalik tennis malikasi 4 ta breyk qayd etdi. 

Credit One Charleston Open turniridagi muvaffaqiyatli ishtirok Kollinzga 500 reyting ochkosi hamda 142,000 AQSH dollari miqdorida mukofot puli taqdim etdi. Kollinz ketma-ket ikkinchi hafta ham sovringa ega chiqmoqda. O'tgan hafta u Mayami WTA 1000 toifasiga kiruvchi turnirda ham chempion bo'lgandi. 

Daniel bugun elon qilingan yangilangan WTA reytingida dunyoning 15-raketkasiga aylandi. Kollinz ketma-ket 13 ta uchrashuvda zafar quchdi. Kasatkina esa aksincha, mavsumdagi uchinchi finalida ham mag'lubiyatga uchradi.