Kurash. Endi Osiyo o'yinlarida 7 ta emas, 17 ta medallar jamlanmasi o'ynaladi

Indoneziya mezbonlik qilgan o'yinlarda milliy sportimiz bo'yicha 7 ta vazn toifasida bahslar tashkil qilindi. Bu albatta bizni quvontirmay qo'ymaydi.

Kecha yurtimizga Osiyo Olimpiya Kengashi prezidenti SHayx Ahmad Al-Fahad Al-Sabax boshchiligidagi delegaciya vakillari tashrif buyurganliklari haqida malum qilgandik. Mazkur delegaciya tarkibida Xalqaro kurash associaciyasi prezidenti, OOK Osiyo o'yinlari departamenti direktori Haydar Farmon ham O'zbekistonga kelgan.

Bugun Milliy olimpiya qo'mitasi prezidenti Umid Ahmadjonov poytaxtimizdagi «Hyatt Regency» mehmonxonasida Haydar Farmon bilan uchrashuv o'tkazdi. Unda o'zbek milliy sporti hisoblangan kurashning Osiyo o'yinlaridagi o'rnini mustahkamlash yo'lida muzokaralar olib borildi. 

Uchrashuvda MOQ rahbari musobaqaning kurash bo'yicha bahslarida vaznlar toifasini ko'paytirish g'oyasini ilgari surdi. Ushbu taklif Xalqaro kurash associaciyasi prezidenti tomonidan ham qo'llab-quvvatlandi. Bu bo'yicha Osiyo Olimpiya Kengashi hulosasi Hanchjou-2022, Nagoya-2026 o'yinlari tashkiliy qo'mitasiga ham yuborildi.

Demak, uchrashuv yakunlariga ko'ra, 2022 yilgi Osiyo o'yinlaridan boshlab kurash 15 ta vazn toifasida (7 ta erkaklar, 8 ta ayollar) tashkil etiladi. SHuningdek, erkaklar va ayollar o'rtasida jamoaviy bellashuvlar ham o'yinlar dasturidan o'rin oladi. SHu tariqa, milliy sportimiz nufuzi Osiyo o'yinlarida yanada ko'tariladi va kurash bahslarda umumiy hisobda 17 ta medallar jamlanmasi o'ynaladi.

Eslatib o'tamiz, 2018 yilgi Osiyo o'yinlarida 7 ta vazn toifasida (4 ta erkaklar, 3 ta ayollar) bellashuvlar o'tkazilgan. Musobaqada yurtimiz sharafini himoya qilgan 14 sportchidan 12 nafari medallarga sazovor bo'lgandi.