Kurash federaciyasi ishtirokida matbuot anjumani bo'lib o'tdi

O'zbekiston Respublikasi Prezidentining 2017 yil 2 oktyabridagi qaroriga ko'ra nishonalayotgan ushbu sana dunyoning 140 dan ortiq mamlakatidagi kurash olami vakillarini birlashtirishga xizmat qiladi.

O'zbekiston Jismoniy tarbiya va sport vazirligida bo'lib o'tgan matbuot anjumani ham ayni sanaga bag'ishlandi. Unda Respublika kurash federaciyasi masullari sport turini rivojlantirishga doir amalga oshirilayotgan ishlar bilan jurnalistlarni tanishtirdi. 

Unda ishtirok etgan O'zbekiston kurash federaciyasi raisining sport ishlari bo'yicha o'rinbosari Uyg'un Umurov, federaciya bosh kotibi Abbos To'ychiboevlar kurashni rivojlantirish borasidagi Prezident qarorining ijrosi, shuningdek, bugungi kunda terma jamoalarimizni shakllantirish, kurashning targ'iboti, jahon arenalaridagi mavqei borasida fikr-mulohazalar bildirishdi.

Osiyo o'yinlarining rasmiy dasturiga kiritilishi qita mamlakatlarida o'zbek kurashining davlat reestridan o'rin olishiga va sportchilarning rag'batlantirilishiga sabab bo'lmoqda. 

Matbuot anjumanida 3 yarim ming yillik tarixga ega bo'lgan milliy sportimizni rivojlantirish yo'lida mamlakatimizda amalga oshirilayotgan ishlar yuzasidan jurnalistlarni qiziqtirgan savollarga mutasaddilar tomonidan javob qaytarildi.