Kutilmagan xabar. Qudratillo Abduqahhorovning jangi o'tkazilmaydi

Prof boksda mag'lubiyatsiz odimlayotgan hamyurtimiz ertaga Malayziyada o'zining navbatdagi muhim jangini o'tkazishi kerak edi. Yaqindagina WBC Silver chempionlik kamaridan voz kechgan charm qo'lqop ustamizning yarim o'rta vazn toifasida IBF chempionlik kamari uchun saralash jangida ringga chiqishi belgilab qo'yilgandi. 

Aniqrog'i, 25 yoshli Abduqahhorov hamda yaponiyalik 31 yoshli Keita Obara o'rtasidagi jang g'olibi ushbu vazn toifasida IBF chempioni Errol Spensga qarshi ringga ko'tarilish huquqini qo'lga kiritardi. Lekin bu jang endi o'tkazilmaydi. 

Abduqahhorov ayni paytda Toshkentda va u tez orada AQSHga jo'nab ketadi. Bokschimizning bizga xabar berishicha, uning navbatdagi jangi fevral oyida Amerikada o'tkaziladi. Qudratillo dunyoga mashhur promouterlik kompaniyalarining biri bilan shartnoma imzolashi shart. Aks holda mana shunday noprofessional yondashuv davom etaveradi. 

Avvaliga WBC Silver chempionlik kamarini o'z vaqtida himoya qilmagani uchun unvonsiz qoldi. Keyin esa to'laqonli chempionlik kamari uchun jang qilish uchun imkoniyat taqdim etadigan muhim saralash bahsi ham bekor bo'ldi. 

Malumot uchun, Qudratillo Abduqahhorov (15-0, 9 KOs) professional boksdagi faoliyati davomida 15ta jang o'tkazib, ularning barchasida g'alaba qozongan. To'qqizta jangda raqiblarini nokautga uchratgan.