Makgregor bitta jang bilan Forbes reytingida qayd etildi

Reytingda 100 nafar sportchi bo'lib, uning 21-pog'onasidan Konor Makgregor joy olgan. Nashr uning sof daromadini 47 million dollarga baholadi. O'tgan bir yil ichida Konor bittagina jang o'tkazgan. 

Xabibga qarshi o'tkazgan jangi unga rekord darajadagi gonorar keltirdi. Konor kafolatlangan 3 million dollardan tashqari, rekord darajadagi PPV, yani pulli translyaciyadan 30 million dollarga ega bo'ldi. 

Reebok bilan yillik 5 million dollardan iborat homiylik shartnomasini imzoladi. Beats Electronics, Burger King, Monster Energy, Anheuser-Busch InBev va Budweiser kompaniyalari bilan imzolangan shartnomalar ham Konorga yaxshigina pul olib keladi.

O'tgan yilgi reytingda Konor Makgregor 99 million dollar bilan 4-o'rinda qayd etilgandi. O'shanda Floyd Meyvezerga qarshi boks qoidalari asosida o'tkazgan jangi unga katta gonorar keltirgandi.