Makgregor o'zi ishtirokidagi bekor bo'lgan matbuot anjumaniga munosabat bildirdi

Irlandiya poytaxti Dublin shahrida o'tkazilishi belgilangan jang bekor qilingandi. Tashkilotchilar esa bunga nima sabab bo'lganiga izoh ham berishmagandi. Konor bu vaziyatga o'z fikrini bildirib, Maykl CHendler bilan jangiga bag'ishlangan matbuot anjumanining qoldirishiga hech qanday aloqasi yo'qligini aytdi.

"Biz UFC bilan Dublinda matbuot anjumani o'tkazishga kelishib olgandik. Lekin bizga aloqador bo'lmagan holatlar sabab bu tadbir bekor qilindi. Irlandiyalik muxlislardan, hamyurtlarimdan, butun dunyoda menga befarq bo'lmagan insonlardan o'zimga bog'liq bo'lmagan holat uchun uzr so'rayman. Hamisha sizning qo'llab-quvvatlab turishingizni his qilganman. Oktagonga qaytib, barcha davrlardagi eng ajoyib shou ko'rsatishni sabrsizlik bilan kutyapman", - dedi uch yillik tanaffusdan so'ng "qafas"ga qaytayotgan Konor. 

Eslatib o'tamiz, yarimo'rta vaznda o'tkaziladigan Konor Makgregor - Maykl CHendler jangi 29 iyun kuni Las-Vegas shahrida tashkil etiladigan UFC 303 turnirining markaziy to'qnashuvi bo'ladi. UFC rahbari Dana Uaytning xabar berishicha, bu turnir uchun rekord darajada - 20 million dollarlik chiptalar sotib bo'lingan.