Meksikada WBC tashkilotining yillik 60-Kongressi ish boshladi, unda superog'ir vazndagi bokschimiz ham qatnashyapti

Tinch okeani qirg'og'idagi ushbu sayyohlik shahri 11 noyabrga qadar tashkilotning yubiley 60-kongressiga mezbonlik qiladi. Unda Butunjahon boks ittifoqiga azo ikki yuzga yaqin davlatdan delegatlar ishtirok etyapti. Ular orasida O'zbekiston nomidan qatnashayotgan Timur Ibragimov ham bor. 

Ibragimov o'z vaqtida havaskor boks bo'yicha sobiq Ittifoq chempioni, besh karra O'zbekiston chempioni, Osiyo chempioni hamda Atlanta-96 Olimpiadasi ishtirokchisi bo'lgan. O'n ikki yil davom etgan professional bokschilik faoliyati davomida 37 ta jang o'tkazgan bo'lib, 31 (16 nokaut) g'alaba, 4 mag'lubiyat va 1 durang qayd etgan. 

Ibragimovning bizga xabar berishicha, WBC prezidenti Maurisio Suleyman boshchiligida o'tkazilayotgan kongressning birinchi kuni bir qator tadbirlar o'tkazilishi barobarida muhim masalalar ham muhokama qilingan. Kongressning tantanali ochilish marosimida Maurisio Suleyman, Gerrero shtati gubernatori Evelin Salgado Pineda so'zga chiqishgan.