"Metallurg" uch nafar legioner bilan shartnoma imzoladi

Qishki transfer oynasi ochilishi hamon klub rahbariyati uch nafar xorijlik futbolchi bilan kelishuvga erishdi.

Superliga-2023 mavsumi yakunida "Metallurg" jamoasi bilan shartnoma muddatini yana uch yilga uzaytirgan bosh murabbiy Vesko Steshevich ikki nafar hamyurtini Bekobod klubida o'ynashga ko'ndirdi. Ularning har ikkalasi hujumkor futbolchilar ekanligi etiborga molik. O'tgan mavsumni Litvaning "Jalgiris" (Vilnyus) jamoasida o'tkazgan Marko Milichkovich markaziy hujumchi ampluasida ko'proq maydonga tushadi. 

CHernogriyaning "Arsenal" klubidan kelayotgan Boban Jorjevich esa ko'proq hujum ortida o'ynaydi. Jamoaning hujumlarini tashkil etish va imkon tug'ilishi hamon boshlangan kombinaciyani yakunlashni xush ko'radigan Boban "Metallurg"ning oldingi chizig'ini kuchaytirishi kutilyapti.

Bekobodliklarning himoya chizig'ida esa tajribali Davronjon Ergashev paydo bo'layapti. "Bunyodkor" bilan shartnomasi tugab, erkin agentga aylangan tojikistonlik futbolchi ham faoliyatini "Metallurg" bilan bog'lashga qaror qildi. SHuning barobarida bekobodliklar legioner o'yinchilar limitidan to'liq foydalanib bo'lishganini ham qayd etish lozim.