Mutua Madrid Open turnirining chempioni aniqlandi

Hal qiluvchi final uchrashuvida dunyoning birinchi hamda ikkinchi raqamli tennis malikalari - polshalik Iga Svyontek va belaruslik Arina Sobolenko o'zaro to'qnash kelishdi. O'tgan yilgi finalda ham bu ikki tennischi bosh sovrin uchun kortga chiqishgan va o'shanda Sobolenko g'alaba qozonib, bosh sovrin sohibiga aylangandi.

Bu safar Iga o'sha mag'lubiyat uchun revansh oldi. Dramatik ruhda kechgan final bahsida Svyontek matchboldan chiqib ketdi va yakunda irodali g'alabaga erishdi - 7/5, 4/6, 7/6(7). Hal qiluvchi uchinchi setni 5/6 hisobida boy berayotgan Svyontek ikkita matchboldan chiqib ketishga muvaffaq bo'ldi. 

Uchrashuv statistikasi:

Iga Svyontek - 2 ta eys, 4 ta qo'shxato, 5 ta breyk

Arina Sobolenko - 4 ta eys, 4 ta qo'shxato, 5 ta breyk

Polshalik tennischi o'zaro uchrashuvlarda oldinda bormoqda - 7:3. Svyontek faoliyatidagi 20-sovrinni qo'lga kiritdi. WTA 1000 toifasidagi bosh sovrinlari esa 9 taga etdi. Iga 2012 yildan keyingi shuncha sovringa ega chiqqan eng yosh tennischiga aylandi. Bundan avvalgi rekord, yani 20 ta sovringa ega bo'lish Karolin Voznyackiga tegishli edi.

Mutua Madrid Open turniridagi muvaffaqiyatli ishtirok Iga Svyontekka 1000 reyting ochkosi hamda 963,225 evro mukofot puli keltirdi.