Og'ir atletika. 18 yoshli Ergashev AQSHdagi jahon chempionatida 4-o'rinni egalladi

Dunyoning yuzdan ziyod davlatidan eng sara atletlar ishtirok etayotgan yilning eng nufuzli musobasida O'zbekiston terma jamoasi polvonlari ham o'z mahoratlarini namoyish etishyapti. Anaxaymda 10 nafar sportchimiz (8 nafari erkaklar, 2 nafari ayollar) supachaga chiqishmoqda.

Atletlarimizning ishtirokini -62 kg vazn toifasidagi hamyurtimiz Adham Ergashev boshlab berdi. Yoshlar o'rtasida jahon va Osiyo chempioni bo'lgan 18 yoshli Ergashev kattalar o'rtasidagi jahon chempionatida ham murabbiylar ishonchini oqladi.

Kuchlilar jam bo'lgan A guruhida ishtirok etgan Adhamjon raqiblari orasida eng yosh sportchi edi. SHunga qaramay 61,85 kg vaznga ega hamyurtimiz dast ko'tarishda 135, siltab ko'tarishda 157, umumiy 292 kg natija bilan kuchli to'rtlikdan joy oldi.

Bronza medalini qo'lga kiritgan gruziyalik 23 yoshli SHota Mshvilidze umumiy 298 kg natijaga erishdi. Ikki kurashda roppa-rosa 300 kg natija ko'rsatgan kolumbiyalik Antonio Valensiya Moskuera jahon chempioniga aylandi.