Og'ir atletika: O'zbekiston chempionati hal qiluvchi pallada

Kecha bir qator vazn toifalarida g'olib va sovrindorlar aniqlandi. Ammo, ko'pchilik muxlislarning etibori shu kuni 73 kg.gacha bo'lgan vazn toifasidagi bahslarga qaratildi. Sababi, ushbu vaznda biryo'la ikki nomdor polvonimiz – Doston Yoqubov va Adhamjon Ergashev o'zaro raqobatlashdi.

Dastlab polvonlar dast ko'tarish mashqida omadlarini sinab ko'rdi. Ushbu yo'nalishda Adhamjon Ergashevning qo'li baland keldi – u 145 kg.lik toshni o'ziga bo'ysundirgan holda kichik oltin medalga sazovor bo'ldi. Doston esa undan atigi bir kilogina past natija qayd etdi va kumush medal bilan taqdirlandi.

Navbat siltab ko'tarish mashqiga keldi. Bu yo'nalishda Dostonning raqiblaridan katta ustunlikka ega ekanligi natijada ham aksini topdi: Yoqubov siltab ko'tarishda 182 kg. natija bilan eng yaqin taqibchisi Adhamjon Ergashevni naqd 7 kiloga ortda qoldirib, kichik oltin medalni qo'lga kiritdi. Ikki kurashda ham tabiiyki Doston g'olib chiqdi. Ushbu vazn toifasida kuchli uchlikka andijonlik Hasanboy Tohirov yakun yasab berdi.

SHuningdek, kecha qizlar o'rtasida -71 kg., -76 kg., -81 kg., -87 kg. hamda +87 kg. vazn toifalarida ham g'oliblar aniqlandi.

Og'ir atletika. O'zbekiston chempionati

Erkaklar. -73 kg:

1. Doston Yoqubov (Toshkent viloyati) – 326 kg (144 kg + 182 kg)

2. Adhamjon Ergashev (Namangan) – 320 kg (145 kg +175 kg)

3. Hasanboy Tohirov (Andijon) – 302 kg (135 kg + 167 kg)

Ayollar. -71 kg:

1. Xusnora Xabirova (Andijon) – 200 kg (87 kg + 113 kg)

2. Laylo Xursanova (Namangan) – 199 kg (92 kg + 107 kg)

-76 kg:

1. Nilufar Kuryazova (Xorazm) – 187 kg (85 kg + 102 kg)

2. Qizlarxon Abduhamidova (Namangan) – 154 kg (74 kg + 80 kg)

-81 kg:

1. Tursunoy Jabborova (Qashqadaryo) – 202 kg (94 kg + 108 kg)

2. Zebo Murodalieva (Andijon) – 150 kg (65 kg + 85 kg)

-87 kg:

1. Dinaxon Tojieva (Qoraqalpog'iston) – 188 kg (80 kg + 108 kg)

2. Zebo Mamarajabova (Navoiy) – 141 kg (64 kg + 77 kg)

+87 kg:

1. Dolera Davronova (Navoiy) – 222 kg (93 kg + 129 kg)

2. SHodmonoy Ochilova (Qashqadaryo) – 160 kg (75 kg + 85 kg)

Ertaga musobaqaning so'nggi kunida erkaklar o'rtasida og'ir vazn toifalarida bahslar bo'lib o'tadi.