Og'ir atletikachilarimiz Peruga jo'nab ketishdi

Dunyoning eng sara atletlari qatnashadigan mazkur musobaqada terma jamoamizning 3 nafar vakili Adhamjon Ergashev (-67 kg), Doston Yoqubov (-73 kg) va Muattar Nabieva (-55 kg) yurtimiz sharafini himoya qilishadi.

“Ushbu musobaqada jahonning eng sara yulduzlari ishtirok etishadi. Unda qatnashish uchun Xalqaro og'ir atletika federaciyasi maxsus taklifnoma jo'natgan bo'lishi kerak. Bunday musobaqani o'tkazishdan maqsad kelasi yilgi Olimpiya o'yinlarida “A” guruhida ishtirok etishi kutiladigan sportchilarni to'plab, ular orasida shiddatli raqobat yuzaga keltirishdir. Umid qilamizki, yurtimiz nomidan taklif etilgan 3 atletimiz o'zlariga bildirilgan ishonchni oqlay olishadi”, – dedi O'zbekiston og'ir atletika federaciyasi raisining birinchi o'rinbosari SHahrullo Mahmudov.

«Bu kabi musobaqada birinchi marta ishtirok etishim. Unda har bir vazn toifasining eng kuchli sportchilari qatnashadi. Qolaversa, turnir o'tadigan mamlakat ham ancha olisda bo'lgani uchun sal avvalroq borishimiz kerak. Federaciyamiz, xalqimiz bizga ishonch bildirib turishibdi. Nasib qilsa, bu ishonchni, albatta, oqlab qaytamiz«, – dedi Adhamjon Ergashev.