Olmaliqdagi jahon chempionati oldidan matbuot anjumani o'tkazildi FOTOGALEREYA

2002-2004 yillarda tug'ilgan o'smir va qizlar o'rtasida o'tkazilayotgan jahon chempionatida Rossiya, Isroil, Hindiston, Eron, Ukraina, Belarus, Xitoy, SHveciya kabi dunyoning 30 ga yaqin mamlakatidan 200 ga yaqin polvonlar ishtirok etadi. 

Olmaliq shahridagi “Olmaliq KMK” sport majmuasi mezbonlik qiladigan musobaqa oldidan bugun matbuot anjumani o'tkazildi. Unda Butunjahon belbog'li kurash associaciyasi prezidenti Gintausas Vileyta, O'zbekiston belbog'li kurash federaciyasi raisi Ravshan Dastirov hamda o'smirlar terma jamoasi bosh murabbiyi Usmon Mahamatov OAV xodimlarini qiziqtirgan savollariga atroflicha javob qaytarishdi. 

“Tarixi uch ming yildan ziyod bo'lgan milliy sport turimiz bo'lgan belbog'li kurash bugun xalqaro maydonga chiqib bormoqda. Asrlar osha o'zida mardlik, halollik, jasorat kabi fazilatlarni jamlagan ushbu sport turi 2017 yil Turkmaniston poytaxti Ashxobod shahrida o'tgan Yopiq inshootlardagi va jangovor sanatlar bo'yicha Osiyo o'yinlari dasturiga kiritildi. Unda ishtirok etgan o'zbekistonlik polvonlar terma jamoamizga eng ko'p medallarni taqdim etdilar. Ertadan boshlanadigan jahon chempionatida ham o'smirlarimiz akalariga munosib izdosh bo'lib voyaga etayotganlarini isbotlashga urinishadi”, - dedi R.Dastirov.

O'z o'rnida Butunjahon belbog'li kurash associaciyasi prezidenti Gintausas Vileyta O'zbekiston nufuzli xalqaro musobaqalarni o'tkazishda katta tajribaga ega ekanligi, Olmaliqdagi jahon chempionati ham yuqori saviyada o'tishi uchun barchar sharoitlar muhayyo qilinganiga urg'u qaratdi. Usmon Mahamatov esa kurashchilarimizning tayyorgarligi haqida batafsil malumot berdi. 

Eslatib o'tamiz, ertaga start oladigan jahon chempionatida  o'g'il bolalar 42, 45, 50, 55, 60, 65, 71, 77, 85, 95 kg.gacha va 95 kg.dan yuqori vazn toifalarida kuch sinashsa, qizlar 44, 48, 52, 57, 63, 70 kg.gacha va 70 kg.dan yuqori vaznda g'oliblik uchun bahs olib borishadi.

Suratlar muallifi - Oqil G'ulomov