Osiyo chempionatida birinchi marta kuchli uchlikdamiz

Qitaning eng iqtidorli polvonlari ishtirokida o'tgan mazkur musobaqada O'zbekiston sportchilari jami 4 ta oltin, 2 ta kumush va 6 ta bronza medaliga sazovor bo'ldilar.

Jumladan, yunon-rim kurashi bo'yicha bo'lib o'tgan musobaqalarda Ilxom Bahromov (-50 kg) va Javohir Miraxmedov (-55 kg) oltin medalni qo'lga kiritgan bo'lsa, Mirzabek Raxmatov (-66 kg) hamda Jalgasbay Berdimuratov (-84 kg) bronza medali sohibi bo'ldilar.

Ayollar kurashi bo'yicha o'tkazilgan bellashuvlarda bir yo'la uch nafar yurtdoshimiz Nodira Sobirova (-51 kg), Nabira Esenbaeva (-59 kg) va Baxtigul Boltaniyozova (-67 kg) bronza medallarini qo'lga kiritdilar.

Erkin kurash musobaqalarida sovrindor bo'lgan sportchilarimiz safi yanada salmoqli bo'ldi. Xususan, G'ulomjon Abdullaev (-55 kg) va Temurjon Usmonohunov (-60 kg) Osiyo chempionidek sharafli unvonga sazovor bo'lishgan bo'lsa, Majid Murodov (-84 kg) va Hasanboy Raximov (-120 kg) kumush, SHohrux Sapaev (-66 kg) esa bronza medaliga sazovor bo'ldi.

Umumjamoa hisobida 56 ochko jamg'argan erkin kurashchilarimiz birinchi marotaba kuchli uchlikdan o'rin egallashdi. Birinchi o'rinni Hindiston terma jamoasi (61 ochko) egallagan bo'lsa, ikkinchi o'rinni hamyurtlarimiz bilan bir xil ochko jamg'argan va faqatgina qo'shimcha ko'rsatkichlarga ko'ra oldinga chiqqan eronlik polvonlar band etishdi.

O'z navbatida yunon-rim kurashchilarimiz umumjamoa hisobida to'rtinchi, qizlar terma jamoamiz esa beshinchi o'rinni egallashdi.