12 iyu 12:07
Yangiliklar

Boks/MMA, Bolalar sporti

O'zbek boksi yulduzlari yosh sportchilar maktabida mehmon bo'lishdi

Teglar : Boks

XXXI yozgi Olimpiya o'yinlari sovrindorlari SHahram G'iyosov va Murodjon Ahmadaliev, shuningdek, boks bo'yicha jahon kubogi g'olibi, Osiyo o'yinlari sovrindori Isroil Madrimovlar Toshkent shahar Bektemir tumanidagi 1-sonli BO'SMga tashrif buyurishdi.

Tuman hokimligining Manaviyat targ'ibot bo'limi tashabbusi bilan tashkil etilgan tadbirda Bolalar o'smirlar sport maktabida kamol topayotgan ikki yuzdan ziyod yosh sportchilar ishtirok etishdi.

Bugungi kunda 1-sonli BO'SMda sportning 14 ta turi bo'yicha mashg'ulotlar olib borilmoqda va ushbu o'quv-sport maskanida tahsil olayotgan 772 nafar yoshlar sportning futbol, boks, erkin kurash, dzyudo, badiiy gimnastika, tennis, stol tennisi, gandbol, taekvondo (WTF), o'zbek jang sanati, basketbol, velosport, milliy kurash va sambo turlari bilan shug'ullanib kelishmoqda.

Yaqindagina poytaxtimizda bo'lib o'tgan boks bo'yicha Osiyo chempionatida butun dunyoni hayratga solib 10 ta vazn toifasining to'qqiztasida oltin medallarga sazovor bo'lgan O'zbekiston terma jamoasi azolarining sport maktabiga tashrifi bolajonlarga cheksiz quvonch va shodlik ulashdi.

O'z navbatida SHahram G'iyosov, Murodjon Ahmadaliev va Isroil Madrimovlar yig'ilganlarga o'zlarining sportdagi ilk qadamlari, birinchi ustozlari, bolalik xotiralari xaqida so'zlab berishdi. SHuningdek, Olimp shohsupasiga qadar bosib o'tilgan mashaqqatli yo'l, tinimsiz mashg'ulotlar, o'quv-yig'inlari, nufuzli musobaqalardagi ishtirok xaqidagi suhbatlar yosh sportchilarda katta qiziqish uyg'otdi.

Tadbir davomida 1-sonli BO'SM tarbiyalanuvchilari boks, badiiy gimnastika, kurash, dzyudo bo'yicha ko'rgazmali chiqishlar qilib, mehmonlarga o'z mahoratlarini namoyish etishdi. Suhbat tarzida o'tkazilgan mazkur tadbir davomida professional sportchilar kelajak avlod vakillarini qiziqtirgan barcha savollarga javob berishdi.

Tadbir so'nggida boks yulduzlari bolajonlar va ularning ustozlari bilan bilan esdalik uchun suratga tushib, dastxatlar qo'yib berishdi. Bu uchrashuv yosh sportchilar qalbida bir umrga muhrlanib qolishi shubhasiz.

Havola :

Manba : olympic.uz

Reyting: