O'zbekiston Litva va Rossiyadan ikki nafar tennischini mahalliylashtirdi

"Ikki iqtidorli sportchi Layma Vladson va Aleksandra Barmicheva O'zbekiston fuqaroligini oldi va endi xalqaro arenada mamlakatimiz sharafini himoya qiladi.

Layma Vladson — O'zbekiston professional tennisi yangi yuzi

18 yoshli tennischi Layma Vladson, ilgari Litva nomidan ishtirok etgan, ITF talqiniga ko'ra, dunyoning eng kuchli 10 nafar yosh qizlari qatoriga kiradi va WTA jahon reytingida 887-o'rinda turadi. U yoshligidan yuksak natijalar ko'rsatib, Evropaning eng istiqbolli sportchilari safida tilga olinadi. SHuningdek, u 2025 yil 9–15 iyun kunlari bo'lib o'tgan W15 Tashkent professional turnirida yakkalikda g'olib bo'lgan.

Vladsonning asosiy yutuqlari:

 • 7 ta ITF Juniors unvoni, jumladan J300 Porto Alegre (Braziliya), J300 Asuncio'n (Paragvay) — 2025 yil;

 • W15 Tashkent (O'zbekiston) — 2025 yil g'olibi;

 • J200 Bratislava (Slovakiya) — 2024 yil, J100 Trnava (Slovakiya), J3 Toshkent (O'zbekiston), J3 Ust-Kamenogorsk (Qozog'iston) va J5 Fujayra (BAA), W15 Tashkent (O'zbekiston) turnirlarida g'alabalar;

 • ITF Junior reytingi — #10 (2025 yil oktyabr).

Layma kuchli birinchi zarbasi, barqaror texnikasi va kortdagi irodali o'yini bilan tanilgan. Uning O'zbekiston bayrog'i ostiga o'tishi mamlakatimiz poziciyalarini jahon tennisida yanada mustahkamlaydigan strategik qadamdir.

Aleksandra Barmicheva — o'zbek tennisi­ning yosh va istiqbolli sportchisi

O'zbekiston fuqarolik olgan yana bir tennischi — 15 yoshli Aleksandra Barmicheva — ITF W15 Tashkent 2025 turnirining eng yosh ishtirokchisi bo'ldi. 2010 yil 25 iyulda tug'ilgan Aleksandra allaqachon xalqaro musobaqalarda ishonchli o'yin namoyish etib, yuqori salohiyatini ko'rsatmoqda.

Barmichevaning asosiy yutuqlari:

 • J100 Vancouver (Kanada) — 2025 yil yakkalik chempioni;

 • J100 CHo'lpon-Ota (Qirg'iziston) — juftlik chempioni Tatyana Golovina bilan.

2025 yilda Aleksandra kattalar turida debyut qildi va ITF W15 Tashkent'da ishtirok etib, o'z faoliyatida muhim qadam qo'ydi.