O'zbekiston regbi bo'yicha Parij-2024 Olimpiadasida ishtirok etishni rejalashtirmoqda

Kecha O'zbekiston Milliy olimpiya qo'mitasida ushbu qarorda belgilab berilgan chora-tadbirlar ijrosini bajarish, regbi sportining rivojini yangi bosqichga olib chiqish mavzusiga bag'ishlab kengaytirilgan yig'ilish o'tkazildi. Yig'ilishni O'zbekiston Respublikasi Oliy Majlisi Senat raisining birinchi o'rinbosari, O'zbekiston regbi federaciyasi rahbari Sodiq Safoev olib bordi. 

SHuningdek, yig'ilishda Jismoniy tarbiya va sport vazirining birinchi o'rinbosari Oybek Kasimov, Respublikamizdagi barcha viloyatlar, Toshkent shahri va Qoraqalpog'iston Respublikasidan tashrif buyurgan mutasaddilar ham ishtirok etishdi.

Yig'ilishda dastavval regbi sportini rivojlantirish bo'yicha 2019-2022 yillar uchun ishlab chiqilgan “Yo'l xaritasi” tanishtirildi va qabul qilingan qaror mohiyati haqida yana bir bor to'xtalib o'tildi. 

“Muhtaram Prezidentimiz har bir sport turi rivoji uchun bunday alohida qaror chiqarmaydilar. Regbi butun jahonda o'z o'rni va mavqeyiga ega bo'lgan sport turlaridan biri. Bu qarorning qabul qilinishi bizni yanada ilhomlantirdi. SHu bilan birgalikda elkamizga katta masuliyatni ham yukladi. Regbini yanada rivojlantirish haqida gap ketar ekan, avvalo, terma jamoaning moddiy-texnik bazasini kuchaytirishimiz kerak. Bor imkoniyatlardan samarali foydalanib, kuchli jamoalar shakllantirish lozim. Yil oxirigacha har bir viloyatda kamida bittadan ana shunday jamoa tuziladi. Qolaversa, regbi-15, regbi-7 bo'yicha ham erkaklar, ham ayollar bo'yicha kattalar, yoshlar jamoasini shakllantiramiz. Parijda bo'lib o'tadigan 2024 yilgi Olimpiya o'yinlariga yo'llanma olish bizning oldimizda turgan eng asosiy vazifa. Ishonamanki, ishni yaxshi yo'lga qo'ya olsak, buni uddalaymiz”, – dedi Sodiq Safoev. 

SHuningdek, yig'ilish davomida regbi sportining har bir viloyatdagi rivojlanish darajasi, yuzaga kelayotgan muammolarni bartaraf etish chora-tadbirlari to'g'risida tegishli vazifalar belgilab berildi.