O'zbekiston Respublikasi Prezidenti sovrini uchun o'tkazilayotgan jahon chempionatining ochilish marosimi bo'lib o'tdi

Kecha oqshom “Olmaliq KMK” AJ sport majmuasida ushbu nufuzli musobaqaning tantanali ochilish marosimi bo'lib o'tdi.

Tadbirda Xalqaro belbog'li kurash federaciyasi prezidenti Gintausas Vileyta, jismoniy tarbiya va sport vaziri Dilmurod Nabiev, Milliy olimpiya qo'mitasi prezidenti Rustam SHoabdurahmonov, Toshkent viloyati hokimining birinchi o'rinbosari Odilxon Rustamov, sportchi va murabbiylar, ommaviy axborot vositalari xodimlari va boshqalar ishtirok etishdi.

Ochilish marosimida so'zga chiqqan Xalqaro belbog'li kurash federaciyasi prezidenti Gintausas Vileyta musobaqaga yuqori saviyada tayyorgarlik ko'rilganligini takidlar ekan, belbog'i kurash sportiga qaratilgan etibor uchun O'zbekiston Respublikasi Prezidenti SHavkat Mirziyoevga, Jismoniy tarbiya va sport vazirligi, Milliy olimpiya qo'mitasi, Toshkent viloyati hokimligi, mamlakat belbog'li kurash federaciyasiga minnadorchilik bildirdi.

Jahon chempionatini ochib bergan jismoniy tarbiya va sport vaziri Dilmurod Nabiev turnir ishtirokchilarini qutlar ekan, shunday dedi: —“Muhtaram Prezidentimiz tomonidan yurtimizda jismoniy tarbiya va sportni yanada ommalashtirish xususan milliy sportimiz bo'lgan belbog'li kurashni rivojlanishiga alohida etibor qaratilmoqda. Natijada mazkur sport turi bilan shug'ullanuvchilar soni hozirgi kunga kelib mamlakatimizda yuz ming nafarga yaqinlashdi. Ushbu musobaqa ham dunyo bo'ylab belbog'li kurashni keng ommalashtirish maqsadida tashkil etildi. Barcha ishtirokchilarga omad yor bo'lishini tilab qolaman”.

Musobaqani tomosha qilish uchun yurtimizni turli hududlaridan belbog'li kurash ixlosmandlari tashrif buyurishgan.

Tadbir davomida xonandalar tomonidan kuy-qo'shiqlar kuylandi. O'zbek milliy raqslari bilan birgalikda mehmon mamlakatlarning milliy raqslari ijro etilishi yig'ilganlarga yanada ko'tarinki kayfiyat ulashdi. 

Eslatib o'tamiz, ushbu chempionatda o'g'il bolalar o'nta vazn toifasida (42, 45, 50, 55, 60, 65, 71, 77, 85, 95 kg.gacha va 95 kg.dan yuqori) kuch sinashsa, qizlar ettita (44, 48, 52, 57, 63, 70 kg.gacha hamda 70 kg.dan yuqori) vaznda g'oliblik uchun bahs olib borishadi.

Musobaqada o'z vazn toifalarida 1-o'rinni qo'lga kiritgan polvonlar 1500 AQSH dollori, 2-o'rin sohiblari 1000 AQSH dollari hamda 3-o'ringa sazovor bo'lgan polvonlar 500 AQSH dollari miqdoridagi pul mukofotlari bilan ham taqdirlanadi.