"O'zbekneftgaz" futbol klublarini moliyalashtirishni butkul to'xtatdi. Tashkilot Rivaldo oldidagi qarzlarni ham to'lamaydi

Bu haqda 20 aprel kuni bo'lib o'tgan matbuot anjumanida kompaniya boshqaruvi raisining birinchi o'rinbosari Suhrob Hamroev malum qildi, deb xabar bermoqda Gazeta.Uz muxbiri.

Mutaxassisning takidlashicha, klublarni moliyalashtirishni to'xtatish jarayoni bosqichma-bosqich emas, balki birdaniga amalga oshirilgan. Bunga qadar kompaniya tomonidan "Nasaf", "Buxoro", "Bunyodkor", shuningdek, tizim korxonalari orqali "Mashal" va "SHo'rtan" jamoalarini saqlab turish uchun yiliga o'rtacha 200–300 milliard so'm homiylik mablag'lari yo'naltirib kelingan.

SHuningdek, anjuman davomida "Bunyodkor" jamoasida to'p tepgan braziliyalik sobiq futbolchi Rivaldo oldidagi 9,2 million evro miqdoridagi qarzdorlik masalasiga ham to'xtalib o'tildi. Suhrob Hamroev ushbu qarzni uzish "O'zbekneftgaz"ning emas, balki bevosita klubning majburiyati hisoblanishini bildirib o'tdi.

Endilikda mamlakatimizda futbol klublarini moliyalashtirishning yangi modeli joriy etilmoqda. Unga ko'ra, Superligada ishtirok etayotgan klublarni qo'llab-quvvatlash maqsadida davlat tomonidan alohida jamg'arma tashkil etilib, 2026 yilda har bir jamoaga 35 milliard so'mdan mablag' ajratiladi.

Bundan tashqari, klublar uchun daromad solig'i bekor qilinib, ijtimoiy soliq stavkasi 1 foiz etib belgilanadi hamda jamoalarni xususiylashtirmoqchi bo'lgan tadbirkorlarga imtiyozli kreditlar taqdim etiladi.