Ozodbek Nazarbekov: “Olimpiyachilarimiz bilan faxrlanamiz”

Toshkent xalqaro aeroportida kun qahramonlari tantanali ravishda kutib olindi. Kutib oluvchilar orasida elimizning taniqli kino va teatr akterlari, xonandalar ham bor edi. Ulardan biri O'zbekiston xalq artisti Ozodbek Nazarbekovdir.

“Hech bir soha mamlakatni sportchalik dunyoga tez tanita olmasligiga yana bir bor guvoh bo'ldik. O'zbek sportchilari Braziliya mezbonlik qilgan Olimpiadada misli ko'rilmagan natijalarni qayd etishdi. Ayniqsa, bokschilarimizning ishtiroki barcha qatori menda ham katta taassurot qoldirdi. Yarim tun bo'lishiga qaramay, imkon qadar har bir janglarini ko'rib borishga harakat qildim. Bu tarixiy g'alabalar Mustaqilligimizning 25 yillik shodiyonlariga ajoyib sovg'a bo'ldi. Biz olimpiyachilarimiz bilan faxrlanamiz. Mana bugun juda chiroyli tarzda ularni kutib oldik. Tinch va ozod Vatangagina mana shunday bayramlar yarashadi. O'ylaymanki, sportchilarimizning katta yutuqlari hali oldinda”, - dedi Ozodbek Nazarbekov.

IA Jaxon,

Foto A.Omonkulova