Paralimpiya. 32 nafar sportchimiz 31ta medalni qo'lga kiritdi

To'rt yillikning eng nufuzli musobaqasida 5ta sport turida 32 nafar sportchi bilan ishtirok etgan paralimpiyachilarimiz yakundan tarixiy natijani qayd etishdi. 

Ana shu 32 nafar sportchimiz musobaqada jami 31ta medalni qo'lga kiritishdi. Medallardan 8tasining oltin ekanligi har birimizga faxru iftixor baxsh etadi. SHuningdek, terma jamoamiz hisobida yana 6ta kumush hamda 17ta bronza medali ham bor.

Ushbu natija evaziga O'zbekiston terma jamoasi Osiyo qitasida umumjamoa hisobida o'zi uchun birinchi o'rinni naqd qilgan Xitoydan so'ng ikkinchi pog'onani band etdi. Mustaqil Davlatlar Hamdo'stligi mamlakatlari orasida esa Ukrainadan so'ng ikkinchi o'rinni egalladik. Ukraina umumjamoa hisobida kuchli uchlikni yakunlab turgani diqqatga sazovor.  

Terma jamoamizga eng ko'p oltin medallarni dzyudochilarimiz taqdim etishdi. O'z vazn toifalarida SHerzod Namozov, O'tkirjon Nig'matov, Odil Tulendiboev barcha raqiblarini mag'lubiyatga uchratib, shoxsupaning eng yuqori pog'onasiga ko'tarilishdi.

Bundan tashqari, disk uloqtirish bahslarida Husniddin Norbekov, nayza uloqtirishda Aleksandr Svechnikov hamda Nozimaxon Qayumova, suzish musobaqasida Fotimaxon Amilova va Firdavsbek Musabekovlar ham oltin medal bilan taqdirlanishdi.